Грецияда 82 ёшли эркак соҳилда шезлонг устида 76 ёшли эркак билан бўлган муштлашувдан кейин вафот этди
Бир гувоҳнинг айтишича, воқеа жойида шунчалик тартибсизлик юзага келганки, соҳилнинг нариги чеккасидан ҳам чинқириқлар эшитилиб турган.
Грецияда 82 ёшли эркак соҳилда шезлонг устида 76 ёшли эркак билан содир бўлган муштлашувдан кейин вафот этди
Грециядаги соҳиллардан бирида шезлонг устида 70 ёшлардаги эркак билан содир бўлган тўқнашувдан кейин 82 ёшли эркак вафот этди, деб хабар бермоқда маҳаллий ОАВ.
Гувоҳларнинг айтишича, Афина яқинидаги Вулиагмени соҳилида шезлонглардан фойдаланиш устидаги баҳс зўравонлик билан кечган жанжалга айланиб кетган, кейинчалик у янада авж олиб, унга бошқа одамлар ҳам қўшилган.
Воқеа гувоҳларидан бири «Kathimerini» газетасига берган интервьюсида воқеа жойи шу қадар тартибсиз бўлганидан, соҳилнинг нариги чеккасидан ҳам бақир-чақирлар эшитилиб турганини айтди.
Хабар қилинишича, ёши кичикроқ бўлган 76 ёшли эркак ҳибсга олинган. У билан бирга бўлган 21 ёшли аёл ҳам ушланган, бироқ кейинроқ қўйиб юборилган. Гувоҳлар «Ta Nea» кундалик газетасига аёлнинг юзи қон ва шишган ҳолатда бўлганини айтишди.
Муштлашув пайтида 82 ёшли эркак ҳушини йўқотиб йиқилган. Турли хабарларга кўра, тез ёрдам машинаси етиб келгунга қадар унга юрак-ўпка реанимацияси қилинган ва дефибриллятор ишлатилган. У шифохонага олиб борилган ва ўша ерда вафот этган.
Бошқа бир гувоҳнинг айтишича, жабрланувчи бошқа одамларни кутаётган бўлган ва шезлонгни банд қилиб қўйган, бу эса келишмовчиликнинг асл сабаби бўлган кўринади.
Ҳуқуқ-тартибот идоралари жисмоний тўқнашувга нима сабаб бўлгани ва эркакнинг ўлимига нима олиб келганини ўрганмоқда.