Глинка кўчасида портлаш оқибатида вайрон бўлган йўлни қайта тиклаш бошланди
Глинка кўчасида портлаш оқибатида вайрон бўлган йўлни тиклаш ишлари бошланди
Тошкент шаҳрининг Яккасарой туманидаги Глинка кўчасида тўпланиб қолган газ портлаши содир бўлган ва йўлнинг қатнов қисми вайрон бўлган ҳудудда янги асфалт ётқизиш бўйича кенг кўламли ишлар бошланди.
Тиклаш ишларининг боришини пойтахт ҳокими ўринбосари Обид Мўминов, Яккасарой тумани ҳокими Нилуфар Аллабергенова ва туман ИИО ФМБ бошлиғи Алишер Муродов шахсан кўздан кечирдилар.
Идоралар раҳбарлари технологик стандартларга риоя этилиши, қўлланилаётган йўл қопламаси сифати ва ҳаракат хавфсизлигини таъминлаш чораларини баҳоладилар. Масъул шахсларга транспорт оқимини тўлиқ тиклаш ва аҳоли учун юзага келган барча ноқулайликларни бартараф этиш мақсадида асфалтлашни имкон қадар қисқа муддатда якунлаш топширилди.
Эслатиб ўтамиз, ҳодиса 3 сентябрь куни кундузи содир бўлган, дастлабки маълумотларга кўра, бунга ер ости газ қувуридан сизиб чиқиш сабаб бўлган. Газ иссиқлик тармоқлари камерасига сизиб кириб, тўпланиб қолган, бу эса кучли чақнаш ва асфалтнинг зудлик билан кўчиб кетишига олиб келган.
Ҳодиса оқибатида бир киши енгил тан жароҳати олган, шунингдек, тўхтаб турган автомобилларга шикаст етган. Мазкур ҳолат юзасидан аллақачон жиноят иши қўзғатилган.