Германиядаги машғулотлар пайтида 80 га яқин украиналик ҳарбий қочиб кетди

Германияда машғулот ўтаётган 80 га яқин украиналик ҳарбий хизматчи ўқув машғулотлари якунлангач, ҳарбий қисмга қайтмаган. Бу ҳақда Дие Зеит нашри ўтказган суриштирувда маълум бўлди.

Саксония-Анхалт ерининг ўзида 80 га яқин дезертирлик ҳолати қайд этилган бўлиб, бутун Германия бўйича бу кўрсаткич юзлаб ҳарбийларни ташкил этиши мумкин.

2022-йилдан буён 29 мингга яқин украиналик ҳарбий Германиядаги 60 га яқин обьектда ўқ отиш, ниқобланиш, биринчи ёрдам кўрсатиш ва бошқа бошланғич кўникмаларни ўрганган. Германия Мудофаа вазирлиги айрим ҳарбийларнинг машғулот жойларини “ўзбошимчалик билан тарк этгани”ни тасдиқлаган, аммо бутун мамлакат бўйича умумий статистика юритилмайди.

Украина қонунчилигига кўра, ҳарбий қисмни ўзбошимчалик билан тарк этиш дезертирлик ҳисобланади ва бу қилмиш учун қамоқ жазоси берилиши мумкин. Бироқ қочган ҳарбийларнинг Украина судида жавоб бериши эҳтимоли паст. Шу билан бирга, улар Германияда украиналик қочқинлар учун бериладиган соддалаштирилган мақомга автоматик равишда эга бўла олмайди, чунки улар мамлакатга урушдан қочган тинч аҳоли вакили сифатида келмаган.

Уларнинг айримлари бошпана олиш тартиби орқали Германияда қолишга уриниши мумкин. Бунинг учун улар Украинага қайтгач, ўзларига хавф ёки таъқиб таҳдид солишини исботлаши керак. Дие Зеит нашрининг ёзишича, бошпана олиш имконияти паст баҳоланмоқда, лекин бу жараённинг ўзи бир йил ёки ундан кўпроқ вақт давом этиши мумкин.