Германияда бошпана сўровлари сони кескин камайди
Германияда бошпана олиш учун берилган дастлабки аризалар сони камайишда давом этмоқда. Мамлакат Ички ишлар вазирлиги маълумотларига кўра, 2026-йил июл ойида бошпана сўраб мурожаат қилганлар сони ўтган йилнинг шу даврига нисбатан қарийб икки баробар, 2024-йил июлига нисбатан эса қарийб 75 фоизга қисқарган.
Германияда бошпана сўровлари сони сезиларли даражада камайди.
Германия Ички ишлар вазирлигининг маълумотларига кўра, жорий йилнинг июл ойида мамлакатда бошпана бериш бўйича 4311 та дастлабки ариза қабул қилинган. Бу кўрсаткич 2025-йил июлида қайд этилган 8293 та аризага нисбатан деярли икки баробар камдир. 2024-йил июли билан таққослаганда эса мурожаатлар сони қарийб 75 фоизга қисқарган.
Тагессчау нашрининг хабар беришича, бу бир марталик ҳолат эмас, балки бир неча ойдан буён кузатилаётган барқарор тенденсиядир. Масалан, 2026-йилнинг дастлабки олти ойида Германияда илк бор бошпана сўраганлар сони 39 646 нафарни ташкил этган бўлса, ўтган йилнинг шу даврида бу кўрсаткич 72 818 нафар бўлган.
Германия Ички ишлар вазирлиги маълумотларига кўра, 2025-йил давомида жами 113 236 та дастлабки бошпана аризаси қабул қилинган, бу 2024-йилга нисбатан 50 фоиздан ортиқ камдир. Такрорий мурожаатлар ҳам ҳисобга олинганда, ўтган йили жами 168 543 та бошпана аризаси расмийлаштирилган, бу эса аввалги йилга нисбатан 32,8 фоизга кам кўрсаткичдир.
Германия ички ишлар вазири Александр Добриндт ушбу тенденсияни ҳукуматнинг миграция соҳасидаги сиёсати самараси сифатида баҳолаган. Унинг фикрича, мамлакатда чегара назорати кучайтирилиши ва миграция қоидаларининг қатъийлаштирилиши ўз натижасини бермоқда.
Мутахассислар қайд этишича, бошпана сўровларининг камайиши нафақат Германия, балки бутун Европа Иттифоқи учун хос тенденсияга айланган. Бу ҳолат Европа Иттифоқининг миграция қонунчилиги кучайтирилгани билан изоҳланмоқда.
Жорий йил июн ойидан бошлаб Умумевропа бошпана бериш тизими (СЕАС) ишга туширилди. Янги тизимга мувофиқ, Европа Иттифоқи ташқи чегараларида бошпана изловчилар учун дастлабки текширувлар жорий этилди ва уларнинг аризаларини кўриб чиқиш жараёни тезлаштирилди.
Шу билан бирга, Германияда қуруқлик чегаралари орқали ноқонуний кириш ҳолатлари ҳам сезиларли даражада қисқарган. Расмий маълумотларга кўра, 2025-йилда бундай ҳолатлар 62 526 тани ташкил этган. Бу 2023-йилда қайд этилган 127 549 та ҳолатга нисбатан қарийб икки баробар камдир.
Германия ҳукумати бу натижани 2024-йил сентябридан амал қилаётган кучайтирилган чегара назорати билан боғламоқда. Аввал вақтинчалик чора сифатида жорий этилган мазкур тартиб бир неча бор узайтирилган ва ҳозирча сентябргача амал қилади. Ички ишлар вазири Александр Добриндт эса яқинда Испаниянинг Сеута ҳудудидаги миграция инқирозини инобатга олган ҳолда, ушбу назорат чоралари кейинчалик ҳам сақлаб қолинишини билдирган.