Германияда 12 мингдан зиёд киши ҳарбий хизматни рад этиш учун ариза берди
Германияда 2026-йилнинг дастлабки саккиз ойида ҳарбий хизматни рад этиш бўйича 12 102 та ариза келиб тушган. Бу ўтган йил давомида қайд этилган жами кўрсаткичдан уч баравардан зиёд. Ўсиш хавфсизлик билан боғлиқ вазиятнинг кескинлашуви ва ёшларга ҳарбий хизмат ҳақида анкеталар юборила бошлангани билан изоҳланмоқда.
Германияда 12 мингдан ортиқ одам ҳарбий хизматдан бош тортиш учун ариза топширди
Функе медиагуруҳининг Федерал оила ва фуқаролик жамияти масалалари идораси — БАФзА маълумотларига таянган ҳолда хабар беришича, 2025-йил давомида ҳарбий хизматдан воз кечиш бўйича 3 879 та ариза келиб тушган. Жорий йилнинг январ–август ойларида эса бу кўрсаткич 12 мингдан ошган.
Идора вакили айтишича, ариза берувчилар ҳужжатларни тўлдиришда кўп ҳолларда хатоларга йўл қўймоқда. Айрим мурожаатларнинг мазмуни ҳарбий хизматдан бош тортишни асосли деб топиш талабларига мос келмагани сабабли улар кўриб чиқилмасдан қайтарилмоқда. Демак, келиб тушган аризаларнинг ҳаммаси ҳам қаноатлантирилмаган.
Германияда ҳарбий хизмат тизимини ислоҳ қилиш ҳақидаги қонун 2026-йил 1-январдан кучга кирган. Унга кўра, 18 ёшга тўлган йигит ва қизларга армияда хизмат қилишга тайёрлиги ҳамда яроқлилигини аниқлаш учун анкета юборилмоқда. Йигитлар уни тўлдириши мажбурий, қизлар учун эса жавоб бериш ихтиёрий.
Мамлакатда 2011-йилдан бери тўхтатиб қўйилган мажбурий ҳарбий хизмат ҳозирча қайта жорий этилмаган. Бироқ кўнгиллилар сони белгиланган эҳтиёжни қопламаса, Бундестаг алоҳида қонун орқали «эҳтиёжга қараб мажбурий ҳарбий хизмат» тартибини жорий этиши мумкин. Германия 2035-йилга бориб фаол ҳарбийлар сонини 260 мингга етказишни режалаштирмоқда.
Мажбурий хизматнинг қайта тикланиши эҳтимоли ёшлар орасида норозиликларга ҳам сабаб бўлмоқда. Сентабр ойида мамлакатнинг бир қатор шаҳарларида мактаб ўқувчилари иштирокида йирик норозилик намойишлари ўтказилган.
Бундесвер эса янги хизматчиларни жалб қилиш усулларини кенгайтирмоқда. Жумладан, қуролли кучлар Кёлнда ўтказиладиган дунёдаги энг йирик видеоўйин кўргазмаларидан бири — Гамессомъда ҳам ўз стенди билан қатнашмоқда.
Шу билан бирга, Германия Мудофаа вазирлиги армияда хизмат қилаётганлар сони ҳам ошганини маълум қилган. 2026-йил июл охирида Бундесвер сафида 186 700 нафар ҳарбий бўлган. Бу сўнгги 13 йилдаги энг юқори кўрсаткич бўлиб, ўтган йилнинг шу даврига нисбатан 3 700 нафарга кўп.
Бундесвернинг расмий маълумотига кўра, июл охиригача қарийб 378 мингта анкета юборилган, 2 630 нафар номзод эса хизматга яроқлиликни баҳолаш жараёнидан ўтган. Шу вақтгача ҳарбий хизматга кириш учун келиб тушган аризалар сони 47 300 тага етган — бу ўтган йилнинг мос даврига нисбатан 26 фоиз кўп.