Германия ИИВ: айрим украиналик эркаклар депортация қилиниши мумкин
Германия 2026-йил 31-июлдан кейин мамлакатга келган, 23 ёшдан 60 ёшгача бўлган ва ҳарбий хизматдан расман озод этилганини ёки Украинадан қонуний чиқиб кетганини тасдиқлай олмайдиган украиналик эркакларга вақтинчалик ҳимоя мақомини автоматик тарзда бермайди. Германия Ички ишлар вазирлиги бундай шахслар бошпана сўраб мурожаат қилиши мумкинлигини билдирди.
Германия Ички ишлар вазирлиги (ИИВ) маълумотига кўра, айрим украиналик эркаклар Германиядан депортация қилиниши мумкин. Бу ҳақда вазирлик 13-август куни ДВ сўровига жавобан хабар берди.
Германияда 23 ёшдан 60 ёшгача бўлган, ҳарбий хизматга мажбур украиналик эркакларга вақтинчалик ҳимоя мақомини бериш тартиби ўзгартирилди. Европа Иттифоқи Кенгашининг яқинда қабул қилинган қарорига биноан, бу янги чеклов 2026-йил 31-июлдан бошлаб Германияга келган украиналик эркакларга нисбатан қўлланилади.
Эндиликда вақтинчалик ҳимоя мақомини олиш учун улар Украина ҳудудини қонуний асосда тарк этганини ёки ҳарбий хизматдан расман озод қилинганини тасдиқловчи ҳужжатларни тақдим этишлари шарт бўлади. Ушбу янги тартиб Германияда аввалдан вақтинчалик ҳимоя мақомини олган украиналик эркакларга тааллуқли эмас.
Германия ИИВнинг таъкидлашича, вақтинчалик ҳимоя олиш учун асосга эга бўлмаган, аммо мамлакатда қолишни истаган ҳарбий хизмат ёшидаги украиналик эркаклар бошпана сўраб ариза топширишлари мумкин. Бундай аризалар ҳар бир шахснинг ҳолатидан келиб чиқиб, индивидуал тартибда кўриб чиқилади. Шу билан бирга, вазирлик Украинада ҳарбий хизмат мажбуриятининг мавжудлиги ўз-ўзидан қочқин мақомини бериш учун етарли асос ҳисобланмаслигини қайд этган.
Германия ИИВ, шунингдек, мамлакат ҳудудида қонуний асосларсиз бўлиб турган Украина фуқаролари депортация қилиниши мумкинлигини ҳам билдирган.
Яқинда Европа Иттифоқи Россиянинг Украинага кенг кўламли босқини сабаб мамлакатни тарк этган украиналиклар учун вақтинчалик ҳимоя режимини 2028-йил март ойигача узайтирган эди. Мазкур мақом Украинадан келган фуқароларга ЕИга аъзо давлатларда қонуний яшаш ва ишлаш имконини беради. Бироқ Европа Иттифоқи Кенгаши қарорига кўра, энди Украина қонунчилигида белгиланган ҳарбий мажбуриятларга риоя қилганини тасдиқлай олмайдиган янги келган эркаклар ушбу мақомни автоматик равишда ололмайди. Қарорда бундай талаб Украинанинг ҳозирги мудофаа эҳтиёжлари ҳисобга олинган ҳолда жорий этилаётгани қайд этилган.
Европа Иттифоқига аъзо ҳар бир давлат украиналик эркаклар вақтинчалик ҳимоя олиш учун айнан қандай ҳужжатларни тақдим этиши кераклигини мустақил белгилайди.