Ғазода ўқувчилар уч йилдан сўнг офлайн таълимга қайтди

Ғазода ўқувчилар уч йилдан кейин офлайн таълимга қайтди

Ғазо секторида юз минглаб болалар 19-сентябр куни уч йиллик танаффусдан сўнг илк бор мактабга анъанавий таълим олиш учун қайтди. Аммо дарслар шикастланган биноларда ҳамда вақтинча тикланган чодирларда олиб борилмоқда. Кўплаб оилалар кийим-кечак, дафтар ва ручка сотиб олишга ҳам қийналмоқда.

БМТнинг Болалар жамғармаси (УНИСЕФ) маълумотига кўра, уруш вақтида Ғазодаги мактабларнинг 98 фоизи вайрон бўлган ёки зарар кўрган. Ғазо сектори таълим расмийлари 660 мингга яқин ўқувчи мактаб таълимидан маҳрум бўлганини билдирган. Шунингдек, бу урушда 22 мингга яқин ўқувчи ва 770 дан ортиқ маориф ходими, жумладан 532 нафар ўқитувчи ҳалок бўлган.

Шарқий Хон Юнис таълим директори Иброҳим Рамаданнинг айтишича, мактабларнинг қайта очилиши урушдан кейинги муҳим воқеадир.

“Мен охирги марта мактабга уч йил олдин борган эдим. Ҳозир янги ўқув йилини бошлаяпмиз. Бу қувонч, бахт ва муваффақият йили бўлади”, деди мактаб ўқувчиси Моаед Абу Мустафо.

Мустафо урушда дўстларидан айрилган. Унинг оёқ кийими, дафтари ва ручкаси ҳам йўқ. Шунга қарамай, у чодирда, ерда ўтириб бўлса ҳам ўқишга тайёр.

“Буларнинг барига қарамай ўқиймиз, ҳатто чодирда бўлса ҳам, билим олишда давом этамиз”, деди у.

Оиласи билан чодирда яшаётган 15 ёшли ўқувчи Самар Абу Салми ҳам дарсларга қайтди.

“Биз телефонлар орқали ўқидик ва ўқитувчиларимизни кўрмадик. Энди эса бир чодирдан бошқасига кўчиб юрган бўлсак ҳам, ўз орзуларимиз сари интилишда давом этяпмиз”, деди у.

Унинг ҳам кўплаб зарур ўқув қуроллари йўқ, чунки оиласи уларни сотиб олишга имкон тополмаяпти.

“Урушдан олдин ҳамма нарса бор эди: дафтар, ручка, кийимлар. Ҳаммасини арзон нархда олардик”, деди Салми.

Ғазодаги вайронагарчиликларга қарамай, Таълим вазирлиги халқаро ва маҳаллий ташкилотлар кўмагида 2026/27-ўқув йилини бошлади. Ўқувчиларни жойлаштириш учун чодирлар, брезент, тунука ва ёғочдан ўнлаб вақтинча мактаблар ташкил этилди. Баъзи мактаблар қумли ерда қурилган, бошқаларида эса синфхоналар фақат бир нечта тўшак ва синф доскасидан иборат.

Бошқа бир мактабга бораётган 14 ёшли Ямен Абу Самра ўз кечинмаларини айтиб берди.

“Илгари мактабга бориш учун хурсанд бўлиб уйғонардик. Энди эса мактабга келганимизда ўқлар, ракеталар ва зарбалардан қўрқамиз. Ҳозир мен мутлақо ҳеч нарсаси йўқ, иссиқ чодирда ўтирибман”, деб қўшимча қилди у.

Таълим расмийларининг маълум қилишича, УНИСЕФ қўллаб-қувватлови билан 2026-йилда камида 540 минг ўқувчи вақтинча хусусий мактаблар, ўқув марказлари ҳамда таълим пунктларида офлайн дарсларга қатнашиши кутилмоқда. Дарсларга қатнаша олмайдиган ёки уруш пайтида Ғазони тарк этганлар учун онлайн таълим давом этади.

2025-йилда йирик уруш ҳаракатларини тўхтатган, аммо можарога бутунлай чек қўя олмаган оташкесимга қарамай, Исроил кучлари Ғазонинг 60 фоиздан ортиқ ҳудудини ҳануз назорат қилмоқда. 2023-йил октябр ойида ҲАМАС гуруҳи ва Исроил ўртасида бошланган уруш оқибатида бугунгача 73 914 нафар фаластинлик ҳалок бўлган, 174 952 киши эса яраланган.