Газета мухбирлари “Мустақилликнинг 35 йиллиги” эсдалик нишони билан тақдирланди
Газета мухбирлари Баҳодир Абдуллаев ва Отабек Турдиев ъЎзбекистон Республикаси мустақиллигининг 35 йиллигиъ эсдалик нишони билан тақдирланди. Мукофотларни президент матбуот котиби Шерзод Асадов топширди.
Gazeta.uz мухбирлари Баҳодир Абдуллаев ва Отабек Турдиев "Мустақилликнинг 35 йиллиги" эсдалик нишони билан тақдирландилар. Тақдимот маросими 27-август куни Президент администрацияси ҳузуридаги Оммавий ахборот воситалари учун контент тайёрлаш марказида бўлиб ўтди.
Маросимда Президент администрацияси Коммуникациялар департаменти раҳбари – президент матбуот котиби Шерзод Асадов бир гуруҳ ОАВ вакиллари, контент яратувчилар ва блогерларга эсдалик нишонларини топширди.
Ушбу эсдалик нишони Президентнинг 22-августдаги фармони билан таъсис этилган. Фармонда қайд этилишича, нишон билан "мамлакат иқтисодий қудратини ошириш, тадбиркорлик ва хусусий секторни ривожлантириш, янги иш ўринларини яратиш, аҳоли фаровонлигини, давлат ва жамият ҳаётининг барча соҳаларида ислоҳотлар самарасини таъминлашда жонбозлик кўрсатиб келаётган, ёш авлодни ватанпарварлик руҳида тарбиялаш, юртимизда тинчлик-осойишталик, миллатлараро тотувлик ва бағрикенглик муҳитини мустаҳкамлаш, янги Ўзбекистоннинг халқаро миқёсдаги обрў-эътиборини юксалтиришга муносиб ҳисса қўшаётган ватандошлар" тақдирланади.
Аввалроқ Президент Ўзбекистон мустақиллигининг 35 йиллиги муносабати билан фан, таълим, соғлиқни сақлаш, спорт, маданият ва санъат соҳалари, ОАВ, давлат хизматчилари, ишлаб чиқариш, ижтимоий-иқтисодий соҳалар ходимлари ҳамда ҳарбий хизматчилар ва ҳуқуқни муҳофаза қилиш органлари ходимларининг бир гуруҳини мукофотлаган эди.