Газета 18 ёшини нишонламоқда. Биз билан бирга эканингиз учун раҳмат!
11-август куни Газета 18 ёшини нишонламоқда. Мамлакатдаги деярли йигирма йилнинг энг муҳим воқеалари — ислоҳотлар ва ўзгаришлар, фожиа ва ютуқлар Газета саҳифаларида акс этади. Ушбу йиллар давомида фаолиятимизнинг асосий мўлжали ўқувчиларимиз бўлиб келди.
Газета 18 ёшга тўлди. Биз билан бирга бўлганингиз учун ташаккур!
**Муаллиф: Газета ҳамасосчиси Азамат Атаджанов, бутун таҳририят номидан**
"Gazeta.uz"ни яратиш ғояси бир соат ичида пайдо бўлди. Атиги бир ҳафта ўтиб, 2008-йил 11-августда сайт ишга туширилди ва тезда энг кўп ўқиладиган ҳамда иқтибос келтириладиган манбалардан бирига айланди.
"Одамлар учун янгиликлар берадиган сайт керак", — деб ўйлардик мен ва Сурен Сапов тушлик пайтида бир неча йилдан бери хаёлимизда шаклланиб келган ғояни муҳокама қилар эканмиз. Расмий ОАВлар одамларга керакли маълумотларни бермасди, мавжуд онлайн нашрларнинг аудиторияси эса бор-йўғи икки-тўрт юз кишидан ошмасди.
Айнан сиз, азиз муштарийларимиз, ҳар доим фаолиятимизнинг асосий мақсади бўлиб келгансиз.
Ҳар қандай материални, ҳатто кичик бир янгиликни тайёрлашда ҳам ўзимизга шундай саволлар берамиз: "Бу муштарийлар учун қизиқарли ва муҳимми?", "Улар ажратадиган вақтга арзийдими?", "Бу ҳаммага — мактаб ўқувчисига ҳам, пенсионерга ҳам тушунарлими?"
18 йил ичида Ўзбекистонда кўп нарса ўзгарди.
Мамлакатнинг сўнгги қарийб йигирма йилликдаги энг муҳим воқеалар — ислоҳотлар ва ўзгаришлар, кашфиётлар ва ютуқлар, шунингдек, инқирозлар ва фожиалар Газета саҳифаларида ўз аксини топди. Бизни узоқ вақтдан бери шунчаки "Газета" ва ҳатто "газета" деб атайдиган муштарийларимизга эргашиб, нашрга айнан шу номни беришга қарор қилдик.
Газета ўзининг биринчи ойида — 2008-йил августида мана нималар ҳақида ёзганди:
* [2008-йил август ойидаги энг муҳим янгиликлар]
Газета тажрибаси ўнлаб янги онлайн ОАВлар учун намуна бўлди.
Янгиликлар, репортажлар ва интервюлардан бошлаб, биз босқичма-босқич колонкалар, таҳлилий мақолалар ва шахсий ҳужжатли филмлар даражасигача ўсдик, ижтимоий тармоқларнинг ривожланиши эса доимий равишда янги форматдаги материалларни жорий этишга ундамоқда.
Бизнинг форматларимиздан илҳомланишди, матнларимиздан (ҳавола кўрсатган ва кўрсатмаган ҳолда) мустақил ва давлат ОАВлари иқтибослар келтиришди, янгиликларимизни дастлабки кунлардан бери радиода ўқиб эшиттиришади, айрим қуйидагига ўхшаган фотосуратларимиз эса рамзий маъно касб этади, улар "биздан алоҳида яшамоқда" (биз буни маъқулламаймиз, муаллифлик ҳуқуқини ҳурмат қилиш керак).
* [Газетаънинг ушбу фотосуратидан турли ОАВ ва давлат органлари мунтазам фойдаланиб келади. Муаллиф — Евгений Сорочин.]
Одамларни энг муҳим воқеалардан хабардор қилиш мақсадида ишлайдиган кўплаб мустақил нашрларнинг пайдо бўлиши, бу кимгадир ёқмаслиги мумкин бўлса ҳам, бир вақтлар блоклаб қўйилган хорижий ва маҳаллий ОАВларга бўлган талабни камайтирди. Вақт ўтиши билан (янги президент даврида ва эълон қилинган очиқлик сиёсати доирасида) уларга кириш тўлиқ очиб қўйилди — ва ҳеч қандай ёмон нарса юз бергани йўқ. Ҳалол рақобат шароитида муштарий нимани ўқишни ўзи ҳал қилди.
Бутун дунёда журналистика мураккаб соҳа ҳисобланади.
Журналистлар турли жойлардан репортажлар тайёрлашда саломатлигини хавф остига қўйишига тўғри келади. Кўплаб ходимларимиз шунчаки ўз ишларини қилгани (масалан, суратга олгани ёки репортаж тайёрлагани) учун "участкалар"да нохуш суҳбатларни бошдан кечирди. Бу йўлдан чекинишга мажбур қиладиган таҳдидлар ҳам бўлди.
Бироқ биз ҳар куни янгиликлар ёзишда, репортажлар тайёрлашда, мақола ва интервюларни эълон қилишда давом этмоқдамиз. Биз одамларга сифатли журналистика, илҳомлантирадиган ҳикоялар, энг муҳим нарсалар ҳақида сўзлайдиган матнлар, эркин айтилиш ҳуқуқига эга бўлган фикрлар зарурлигига — содир бўлаётган воқеаларни кўриш, тушуниш ва муҳокама қилишга ёрдам берадиган майдон кераклигига ишонамиз.
Мамлакатда эркинлик кенгайгани сари ёқимсиз "суҳбатлар" ҳам анча камайди. Ҳали ҳам айрим қийинчиликлар бор, лекин бу фақат бугунги Ўзбекистонга хос ҳолат эмас. Катта қийинчиликлардан бири — давлат органларининг ёпиқлиги. Кўплаб қарорлар кенг жамоатчилик муҳокамасисиз қабул қилинмоқда — мамлакат даражасида ҳам, шаҳар ва туманлар, маҳаллалар ва ҳатто ҳовлилар даражасида ҳам. Биз жамоатчилик манфаатлари йўлида янада кўпроқ очиқлик тарафдори сифатида чиқишлар қилишда давом этамиз. Ахир бундан якунда бутун мамлакат ютади.
18 йил давомида Газета таҳририяти бир кишидан иборат жамоадан муҳим ахборотни муштарийларга етказиш учун қийинчиликларни қайта-қайта енгиб ўтишга тайёр, ўз ишига содиқ профессионалларнинг аҳил оиласига айланди. Ўнлаб собиқ ҳамкасбларимиз нашрнинг янада яхшироқ бўлишига ўз ҳиссаларини қўшди. Ўнлаб муаллифлар — экспертлар, олимлар, элчилар, давлат органлари ва халқаро ташкилотлар раҳбарлари ҳамда ходимлари — мамлакат ичида ва хориждан туриб биз учун ёзишда давом этмоқда.
Биз кўп минг кишилик аудиториямизни ҳам ўз оиламиз деб ҳисоблаймиз. Кўплаб муштарийлар материалларимизга мунтазам равишда изоҳлар қолдириб, уларни бойитиб бормоқда. Газетаънинг олдинга ҳаракат қилишига хизмат қилаётган ишонч учун ҳар бирингизга ташаккур!
Шунингдек, кўп йиллар давомида кўрсатган қўллаб-қувватлаши бизга янада ривожланишга ёрдам бераётган реклама берувчиларимизга миннатдорлик билдирамиз. Шахсий ҳужжатли филм ва АҚШдаги Жаҳон чемпионатини ёритиш каби йирик лойиҳаларни амалга ошириш йўлидаги ҳамкорларимизга ҳам раҳмат айтамиз, уларсиз бу мураккаб бўларди.
Ва, албатта, умумий ишимизга қўшган ҳиссаси ва қўллаб-қувватлагани учун бошқа нашрлардаги — онлайн ва анъанавий ОАВдаги ҳамкасбларимизга миннатдорлик билдирамиз.
Биз билан бирга эканингиз учун раҳмат!