Газ қувурлари портлашида гумонланган шахс бошпана сўради
«Шимолий оқим» газ қувурларини портлатишга алоқадорликда гумонланаётган Украина фуқароси Владимир Журавлёв Хорватиядан сиёсий бошпана сўради. Унинг Германияга экстрадиция қилиниши суд томонидан маъқулланган эди.
Газ қувурлари портлашида гумон қилинаётган шахс бошпана сўради
ДВ нашрининг «Суспилне»га таяниб хабар беришича, Журавлёвнинг адвокати Николай Катеринчук бу ҳақда 30-сентабр куни маълум қилган. Ҳимоячининг айтишича, унинг мижози Германияда иши холис кўриб чиқилишига ишонмагани учун бошпана сўраган.
Хорватия суди 23-сентабр куни Журавлёвни Германияга топширишни маъқуллаган.
Гумонланувчи август ўрталарида Германия ҳуқуқни муҳофаза қилувчи идоралари берган ордер асосида ҳибсга олинган. Германиянинг ЛТО нашри маълумотига кўра, у газ қувурлари портлатилиши ҳақидаги ҳужжатли филмни суратга олиш жараёнида қўлга олинган.
Журавлёв 2025-йил сентабр охирида Полшада ҳам ушланган эди. Бироқ ўшанда Варшава округ суди уни Германияга экстрадиция қилишни рад этган.
«Шимолий оқим» ва «Шимолий оқим - 2» сувости газ қувурларидаги портлашлар 2022-йил сентабрида Даниянинг эксклюзив иқтисодий зонасида содир бўлган. Швеция экспертлари ҳодиса жойида портловчи модда изларини аниқлаган.
Кейинги тергов давомида Германия мутахассислари портлашларга алоқадор бўлиши мумкин бўлган олти нафар Украина фуқаросини аниқлаган. Улар орасида дайвинг инструктори бўлиб ишлаган Журавлёв ҳам бор. Гумонланувчиларнинг ҳар бирига нисбатан ҳибсга олиш ордери берилган.