Франсия Павел Дуровни Россияга топширмаслиги маълум қилинди

Франсия Павел Дуровни Россияга топширмайди. Бу ҳақда франсуз адвокати Филипп де Вел маълум қилди.

Россия хавфсизлик хизмати Телеграм асосчиси Павел Дуровни халқаро қидирувга берган эди. Бироқ, Франсия ўз фуқаросини бошқа давлатга экстрадиция қилмаслиги маълум бўлди.

Адвокатнинг сўзларига кўра, Франсия Жиноят-процессуал кодексининг 696-4-моддаси ўз фуқароларини экстрадиция қилишни тақиқлайди.

"Шу билан бирга, айбланувчи агар ушбу қилмишлар билан республикада ҳам жазоланадиган бўлса, мамлакатнинг ўзи жиноий жавобгарликни қўзғатиши мумкин", деди де Вел.

Павел Дуров Россиядан ташқари Франсия, БАА, Сент Киц ва Невис фуқаролигига ҳам эга. Россияда Телеграм асосчисига "терроризмга кўмаклашиш" моддаси бўйича айблов эълон қилинган. Федерал хавфсизлик хизматига кўра, у мессенжердан тақиқланган "Дайвинчик" чатботини ўчирмаган.

Украина махсус хизматлари мазкур ботдан гўёки ёш россияликларни "диверсион-террорчилик фаолиятига жалб этишда" фойдалангани айтилмоқда. Дуровга нисбатан айблов 8 йилдан 15 йилгача озодликдан маҳрум этиш ёки умрбод қамоқ жазосини назарда тутади.

Феврал ойида Павел Дуров Россия ўз фуқароларини давлат назоратидаги иловадан фойдаланишга мажбурлаш мақсадида Телеграмъга киришни чеклаётганини айтганди.

"Роскомнадзор" дастлаб 2025-йил август ойида Телеграм ва ВҳацАпп орқали қўнғироқларни чеклаганди. Ўшанда идора буни мессенжерлар фирибгарлик, товламачилик ва фуқароларни қўпорувчилик ҳамда террорчилик фаолиятига жалб этишнинг асосий воситасига айлангани билан изоҳлаган.