Франсия ортидан Италияда ҳам оммавий тартибсизликлар содир бўлди
17-октабр куни Италияда турмуш кечириш қийматининг юқорилиги, ёқилғи нархлари ва солиқларга қарши бўлиб ўтган намойишлар оммавий тартибсизликларга айланиб кетди.
Франсиядан кейин Италияда ҳам оммавий тартибсизликлар юз берди
Қора кийимдаги юзлаб ёшлар шаҳар марказида полициячиларга қўлбола ёнувчи воситалар, металл тўсиқлар ва шишалар улоқтирди. Кучишлатар тузилмалар намойищиларни тарқатиш учун кўздан ёш оқизувчи газ ва сув пуркагичлардан фойдаланди, бироқ охир-оқибат чекинишга мажбур бўлди.
Шундан кейин намойищилар Пяцса-дел-Дуомо марказий майдонини эгаллаб олди.
Тўқнашувлар натижасида ўнлаб одамлар жароҳатланди, 60 киши қўлга олинди. Уларнинг ярми вояга етмаганлар эди.
Турин, Болоня ва Бергамо шаҳарларидаги тартибсизликлар чоғида намойищилар полициячиларга тошлар ва петардалар отди.
Бош вазир Жоржа Мелони тартибсизликларни қоралаб, намойиш ўтказиш ҳуқуқ эканини, аммо шаҳарларга ўт қўйиб бўлмаслигини таъкидлади.
«Бугун тинч намойишларда қатнашган минглаб кишиларга катта ҳурмат билан қарайман. Бироқ Италия шаҳарлари майдонларида содир бўлган воқеаларни эътиборсиз қолдириб бўлмайди. Миланда ушбу кадрларда кўриниб турганидек, ҳуқуқни муҳофаза қилувчи органлар ходимларига тошлар отилди; полиция ходимлари орасида жароҳатланганлар бор, тартибсизликлар ва зўравонликлар эса юришни тўхтатишга мажбур қилди. Туринда витриналарни синдириш учун ёнида тошлар ва болғалар олиб юрган шахслар қўлга олинди. Болоняда эса тартибсизликлар сабабли эҳтиёт чораси сифатида темирйўл вокзалини ёпишга тўғри келди», - деб ёзди у Х ижтимоий тармоғида Миланнинг марказий майдонидаги намойишлар акс этган видеолавҳаларни жойлаштириб.
17-октабр куни Франсияда оммавий намойишлар бўлиб ўтди — ёшлар яшаш нархи ошишига қарши ҳамда мактабларда ўқиш шароитларини яхшилаш ва олий ўқув юртларига киришнинг ҳозирги тизимини бекор қилиш учун кўчаларга чиқди.
Аксияларда 500 мингдан 800 минггача аҳоли қатнашганлиги айтилмоқда.
Норозилик аксиялари кенг кўламли тартибсизликлар ва талончиликлар билан кечган. Полиция билан тўқнашувлар юзага келган, намойищиларга қарши кўздан ёш сиздирув газ ва сув пуркагичлар қўлланган. Бутун мамлакат бўйлаб мингдан ортиқ киши қўлга олинган.