Франсия ҳукумати нима учун тартибсизликларга тайёр эмасди ва вазиятни қандай назоратга олмоқчи?
Душанбадан Франсияда ўқувчи ва талабалар кузги таътилга чиқишди. Ҳукумат сентабр охиридан буён давом этаётган намойишларда танаффус бўлишидан умид қилмоқда. Бироқ 5-ноябр куни янги йирик норозилик намойишлари ўтказилиши режалаштирилган. Франсия ҳукумати ва президент Эмманюел Макрон қандай йўл тутиши мумкин?
Франсия ҳукумати нима учун тартибсизликларга тайёр эмасди ва вазиятни қандай назоратга олмоқчи?
17-октабр куни бўлиб ўтган оммавий намойишлар тартибсизликлар, ўт қўйиш ва дўконларни талон-торож қилиш билан якунлангач, вазият назоратдан чиқиб кетганини тан олган мамлакат ички ишлар вазири Лоран Нунес истеъфога чиқишга уринди. Аммо президент унинг истеъфосини қабул қилмади. Аксинча, вазирга Франсия шаҳарлари кўчаларида хавфсизликни кучайтириш ва тартибсизликлар айбдорларини жавобгарликка тортиш чораларини ишлаб чиқиш вазифаси топширилди.
Франсия бош вазири Себастен Лекорню душанба куни мамлакатнинг айрим ҳудудларида мерларга зарурат туғилганда қисман комендантлик соати жорий этиш ваколати берилганини билдирди.
Кечга бориб, бир нечта шаҳарда ҳокимият вакиллари бу ваколатдан фойдалангани маълум бўлди. Парижда Республика майдони ва Лес Ҳаллес савдо маркази ҳамда йирик транспорт тугунига туташ кўчаларда маҳаллий вақт билан соат 23:00 дан 06:00 гача барча ёшдагилар учун комендантлик соати эълон қилинди.
Лион марказида соат 22:00 дан 06:00 гача намойишлар ва оммавий юришлар тақиқланди. Лилл ва Ницса шаҳарлари марказларида эса вояга етмаганларнинг кўчага чиқиши тақиқланди.
Лекорнюнинг айтишича, ҳудудий ҳокимият вакиллари тартибсизликлар пайтида полиция ўз ишини қандай ташкил этгани ҳақида саволлар бермоқда. Улар вазият нима сабабдан назоратдан чиқиб кетганини билмоқчи.
Бош вазирнинг қўшимча қилишича, ўтган дам олиш кунларидаги тартибсизликлар вақтида қўлга олинганларнинг 80 фоизига нисбатан жиноий айбловлар қўйилади. У кўчалардаги тартибсизликларда «ўта сўл радикаллар»ни айблади.
Унинг сўзларига кўра, ҳукумат зарар кўрган ҳудудларни тиклаш учун маблағ ажратади ва бу харажатлар тартибсизликларни келтириб чиқарганлар зиммасига юклатилади.
«Мулкка зарар етказган шахслар молиявий жавобгарликка тортилишини таъминлайдиган қонун қабул қилинади», - деди Лекорню.
Бундан ташқари, бош вазир тартибсизликлар ва талон-торожликлар сабаб ўз вазифаларини бажара олмаётган ходимларни қўллаб-қувватлаш учун жамғарма ташкил этилишини эълон қилди.
Якшанба куни президент Эмманюел Макрон халққа телемурожаат қилиб, миллий бирликка чақирди ва Франсия жамоатчилигини зўравонлик ҳаракатларини содир этганлар жазоланишига ишонтиришга уринди.