Франсия футбол федерацияси раҳбари Инфантинони қўллаб-қувватлади
Франсия футбол федерацияси президенти Филипп Диалло Халқаро футбол федерацияси (ФИФА) раҳбари Жанни Инфантинони қўллаб-қувватлашини билдирди. Бу ҳақда франсиялик журналист Ромен Молина маълум қилди.
Манбанинг хабар беришича, Диалло ФИФАга қарши бойкот масаласида УЕФАнинг позициясини қўллаб-қувватлаш ниятида эмас. Таъкидланишича, Франсия президенти Эммануел Макрон ҳам ушбу нуқтаи назарни маъқуллайди.
Аввалроқ ФИФА Форвард Энтерприсе (ФФЕ) деб номланган янги тузилма ташкил этиш режасини эълон қилган эди. Ушбу тузилмага федерациянинг тижорий фаолият йўналишлари ҳамда ФИФА томонидан ташкил этиладиган турнирларни ўтказиш ишлари бирлаштирилиши режалаштирилган эди. Ташкилот янги тузилмадаги улушларни хусусий инвесторларга таклиф қилишни кўзлаган эди.
Ушбу ташаббус УЕФАнинг қаттиқ норозилигига сабаб бўлган ва ЖЧ-2030ни бойкот қилиш эҳтимоли ҳақида хабарлар тарқалган эди. Кейинчалик ФИФА Инфантино номидан баёнот бериб, лойиҳа атрофида келишмовчиликлар мавжудлигини тан олди ва таклиф амалга оширилмаслигини маълум қилди.
Инфантино 2016-йилдан бери ФИФАга раҳбарлик қилиб келмоқда. У 2027-йилда яна президентликка номзодини қўйиш ниятини билдирган. Ташкилот президентлиги учун сайловлар келгуси йил баҳорида Марокашда бўлиб ўтади.