Фото: Тошкентда корейсларнинг миллий ҳосил байрами — Чхусок бўлиб ўтди
Тошкентдаги Корея маданияти ва санъати саройида корейсларнинг ҳосил ва оила байрами — Чхусок нишонланди. Меҳмонларни анъанавий ўйинлар, маҳорат дарслари, миллий таомлар тақдим этилган фудкорт ва ханбок кийиб суратга тушиш учун фотозона кутиб олди. Кун атмосфераси — «Газета» мухбири Орифжон Хошимовнинг фоторепортажида.
Фото: Тошкентда Чхусок — корейсларнинг миллий ҳосил байрами нишонланди
Ўтган шанба, 26 сентябрь куни Тошкентдаги Корейс маданияти ва санъати саройида Чхусок — корейсларнинг ҳосил, оила ва катталарга ҳурмат байрами бўлиб ўтди. Тадбир Ўзбекистон корейс маданият марказлари ассоциацияси томонидан ташкил этилди.
Уч ўн йиллик давомида байрам шаҳар миқёсидаги воқеага айланди. Корея Республикасининг Ўзбекистондаги 1997—2000 йиллардаги элчиси Че Ёнг Ха илгари Чхусок анча камтарона — Корейслар уйида кичик даврада нишонланганини таъкидлади.
«Ишончим комилки, бу каби тадбирлар корейс жамиятимизнинг янада жипслашишига, ўзлигини ва бирдамлигини мустаҳкамлашга хизмат қилади. Кореянинг ўзида Чхусок одатда уйда, оила даврасида нишонланади, у ерда бундай оммавий байрамлар ўтказилмайди. Аммо бу ерда, минтақа мамлакатларида бизнинг корё-сарамлар бирдамликни сақлаш ва маданиятни авлоддан-авлодга узатиш учун қандай бирлашаётганини кўриб турибман», — деди у.
Чхусок меҳмонлари бир нечта анъанавий ўйинларда ўзларини синаб кўришлари мумкин эди: тухонори ўйинида тор идишга камон ўқларини отиш, пэнъи гиргироғини айлантириш, пэнъичигида беллашиш, такчичиги қарта ўйинини ёки фишкаларни улоқтириш орқали конгинори ўйнаш. Наварасининг конгинори ўйинини кузатиб турган томошабинлардан бири унинг болалигида ҳеч қандай махсус фишкалар бўлмаганини — болалар оддий тошлар билан ўйнаганини пайқади.
Кўнгиллилар дальгона — шакарли соталар тайёрлаётган стол атрофида навбат пайдо бўлди. Меҳмонларга нафақат ширинлик улашилди, балки унда қолип ёрдамида шакл кесиб олиш ҳам ўргатилди. Кўнгиллиларнинг сўзларига кўра, буни уйда ҳам такрорлаш қийин эмас. Қўшни маҳорат дарси иштирокчиларига эса кимпаб ўраш ўргатилди.
Фудкортда маҳаллий шохобчалар ҳозирда Кореянинг ўзида оммабоп бўлган кўча таомларини таклиф қилишди: пунопан, пишлоқли медальонлар, корндоглар, ттокпокки, рамён ва тренддаги десертлар.
Шайвонли ҳовуз бўйида ханбок миллий либосини ижарага олиш ва сув фонида суратга тушиш имконияти мавжуд эди. Яқин атрофдаги ярмаркада эса корейс снеклари ва косметикаси сотилди.