Форс кўрфазидаги иттифоқчилар Трампдан норози
Эрон билан тинчлик бўйича келишув бўлмаётгани туфайли араб давлатлари Америка базаларини чиқариб юбориш ҳақида ўйламоқда.
Форс кўрфази мамлакатлари Вашингтондан тобора норози бўлмоқда, чунки иттифоқчилар Доналд Трампнинг Эрон билан келиша олмаётганидан хавотирда, деб ёзади Тҳе Вашингтон Пост минтақадаги ва ғарбдаги расмийларга таяниб.
ВП манбаларига кўра, Саудия Арабистони, БАА, Қатар, Кувайт ва Баҳрайн энди Трамп маъмуриятининг ҳаракатларидан «бирдек ғазабланмоқда».
«Урушни Трамп бошлади, тўловини эса биз қиляпмиз», – дея қайд этган Форс кўрфазидаги мамлакатлардан бирининг расмийси. Унинг сўзларига кўра, АҚШга нисбатан ғазаб 2026-йил февралида Эрон билан уруш бошланганидан буён энг юқори нуқтага етган.
Кучайиб бораётган норозилик баъзи мамлакатларни «ҳамкорликнинг янги вариантлари»ни кўриб чиқишга ва АҚШ ҳарбий базаларини ўз ҳудудларида жойлаштириш қанчалик мақсадга мувофиқ эканини кўриб чиқишга ундамоқда. Аммо ҳозирча Вашингтон Форс кўрфази мамлакатлари учун хавфсизлик масаласида асосий ҳамкор ва асосий қурол етказиб берувчи бўлиб қолмоқда, уларда эса реал муқобил йўқ, деб ёзади ВП.
Форс кўрфази мамлакатларидан бирининг вакилига кўра, улар учун ягона вариант Вашингтон билан иттифоқларини мустаҳкамлашдир. «Биз нима қилсак ҳам, Қўшма Штатларга „йўқ“ дея олмаймиз», – дейди у.
Бироқ, Саудия Арабистони, Туркия ва Покистон ўтган ҳафта имзолаган коллектив мудофаа шартномаси АҚШ учун сигнал бўлди. Европалик юқори мартабали мулозимнинг сўзларига кўра, бу уч давлат шу тариқа «хавфсизлик ва мудофаа соҳасидаги ҳамкорлик муносабатларини диверсификация қилмоқчи».
Оқ уй вакили Трамп Форс кўрфазидаги барча ҳамкорлар билан «ўта яхши» муносабатларга эгалигини айтди. У «Эрон ўз террорчилик ҳаракатлари натижасида ҳар қачонгидан ҳам кўпроқ яккаланиб қолгани»ни таъкидлаган.
Қатар ва Баҳрайнда Американинг йирик базалари мавжуд. Сўнгги ойлар мобайнида улар бир неча марта Эрон ҳужумлари учун нишонга айланди.
18-июн куни АҚШ ва Эрон ҳарбий ҳаракатларни 60 кунга тўхтатиш ва урушни якунлаш бўйича асосий музокараларни бошлашни назарда тутувчи ўзаро англашув меморандумини имзолаганди. Бироқ тез орада ҳарбий ҳаракатлар қайтадан бошланиб кетди ва томонлар бир-бирини сулҳни бузишда айблаб келмоқда.
Трамп мунтазам равишда Эрон билан музокараларда олдинга силжиш борлигини айтади, аммо амалда ривожланиш йўқ. СНН ўз манбаларига таяниб, Америка ҳарбийлари Эронга босим ўтказишнинг янги «креатив» усулларини излаётганини ва бу сўров Трампнинг Ислом Республикасини келишувга мажбурлаш имкониятлари чекланганини кўрсатишини ёзганди.