Флоридада қулаб тушган самолёт учувчиларидан бири 20 ёшли қиз бўлган — НЙП
Қурбонлар орасида мултимиллионернинг оиласи, жумладан, рафиқаси, тўрт ва икки ёшли фарзанди, уларнинг энагаси ва оиланинг дўстлари бўлгани маълум қилинди.
Флоридада қулаган самолёт учувчиларидан бири 20 ёшли қиз бўлган — НЙП
АҚШнинг Флорида штатида 1-ноябр куни Леаржет 60 хусусий самолёти ҳалокатга учради. Ҳодиса натижасида тўққиз киши вафот этди. Самолёт учувчиларидан бири 20 ёшли Наталя Филгейрас экани аниқланди.
Авиаҳалокат АҚШ президенти Доналд Трампнинг Мар-а-Лаго номли хусусий қароргоҳидан тахминан 15 километр узоқликда юз берган. Наталя Филгейрас 17 ёшида учувчилик лицензиясини олган. У тўққиз ой давомида тижорий авиацияда учувчи сифатида ишлаган ва жами 1 300 соат парвоз қилган. Қиз январ ойида 21 ёшга тўлиши керак эди.
Наталянинг қариндошига кўра, у ҳалокатдан 10 дақиқа олдин йигитига қисқа хабар юборган. Унда самолёт кучли силкинаётгани ва музлаётгани айтилган. Ижтимоий тармоқларда тарқалган видеоларда самолёт катта тезликда, деярли тик ҳолатда ерга урилгани кўринади.
Зарба оқибатида ҳалокат жойида улкан кратер ҳосил бўлган. Авиаҳалокатдан олдин диспетчерлар билан бўлган мулоқотда экипаж ўртача даражадаги турбулентлик ва самолёт музлаётгани ҳақида хабар берган. Авиаҳодиса оқибатида мултимиллионернинг оиласи ҳам ҳалок бўлгани айтилмоқда. Самолёт бортида икки учувчидан ташқари технологик компания раҳбари Адам Робинсон, унинг рафиқаси Хелен Шарп, тўрт ва икки ёшли фарзандлари, болаларнинг энагаси ҳамда оиланинг дўстлари бор эди.