Флоридада 12 киши, жумладан болалар жароҳатланган отишмадан сўнг полиция ўсмирни қўлга олди
Воқеа шанба оқшомида, амрикоча футбол бўйича ўйин эндигина якунланган стадион яқинида юз берди.
Флоридада 12 киши, жумладан болалар жароҳатланган отишмадан сўнг полиция ўсмирни ҳибсга олди
Флоридада 12 кишининг жароҳатланишига олиб келган шанба кунги отишма бўйича полиция бир ўсмирни ҳибсга олди.
Отишма маҳаллий вақт билан соат 20:00 да (Гринвич бўйича якшанба 01:00) Таллахасси шаҳридаги америка футболи стадиони яқинида, университет ўйини тугаганидан сўнг содир бўлган.
Маҳаллий полициянинг билдиришича, 11 киши ўқотар қуролдан жароҳат олган, яна бир киши эса воқеа жойидан қочаётганда тўпиғини шикастлаган. Жароҳатланганларнинг ортидан олти нафари болалардир.
15 ёшли Энтони Риверс III га 11 та иккинчи даражали қотилликка суиқасд ва вояга етмаган шахс томонидан ўқотар қуролни сақлаш айбловлари қўйилган.
Полициянинг таъкидлашича, отишма бир-бирини таниган одамлар ўртасидаги даҳанаки жанг ортидан келиб чиққан ва яна бошқа ҳибсга олишлар бўлиши мумкин.
Баёнотда айтилишича, жабрланувчиларнинг ҳеч бири атайлаб нишонга олинмагандек кўринади.
"Жамоамизда байрам бўлиши керак бўлган дам олиш кунлари жабрланувчилар ва уларнинг оилалари учун ваҳма ва зўравонлик кечасига айланди", деди Таллахасси полиция бошлиғи Лоренс Ревелл.
"Биз айбдорларни жавобгарликка тортиш ва ушбу фожиадан жабр кўрган ҳар бир оилага жавоб топиш мажбуриятига содиқ қоламиз."
Якшанба куни полиция олти киши касалхонада эканини, жумладан бир кишининг аҳволи оғирлигини маълум қилди. Бошқа беш кишига эса жавоб берилган.
Ревелл якшанба кунги матбуот анжуманида футбол ўйини туфайли юзага келган тирбандлик сабабли офицерлар тез ёрдам ходимларига етиб олиш учун жабрланганларни қўлларида кўтариб боришларига тўғри келганини айтди.