Филадельфиядаги уйдан суратлар ва видеолар топилганидан кейин бедарак йўқолган беш аёл ҳалок бўлган деб тахмин қилинмоқда
Полициянинг маълум қилишича, уйдан ташвишли видеодалиллар тўплами топилган, бироқ ҳеч қандай инсон қолдиқлари аниқланмаган.
Филадельфиядаги уйдан суратлар ва видеолар топилганидан кейин бедарак йўқолган беш аёлнинг ҳалок бўлганидан хавотир билдирилмоқда
АҚШнинг Филадельфия шаҳрида ушбу ишга алоқадор уйдан ҳуқуқ-тартибот идоралари томонидан қурол-яроғ, гиёҳванд моддалар, сохта шахсий ҳужжатлар ва даҳшатли тасвирлар топилганидан кейин камида беш аёлнинг ҳалок бўлганидан хавотир билдирилмоқда.
44 ёшли Южин Хорш ва унинг отаси яшаган уйда Филадельфия полицияси катта ҳажмдаги рақамли видео ва суратлар архивини топганини маълум қилди. Уларнинг баъзиларида вафот этгандек кўринган беш аёл тасвирланган.
Терговчилар чоршанба куни видеодалилларни текшириш ва қўшимча тафсилотларни тўплаш устида ҳали ҳам ишлаётганликларини билдиришди.
Полициянинг маълум қилишича, уйда терговга алоқадор ҳеч қандай жасад қолдиқлари топилмаган. Хоршга нисбатан аёллар билан боғлиқ бирор-бир жиноят бўйича айблов эълон қилинмаган.
Жиноий даъво аризасига кўра, ушбу иш июнь ойида, боғ назоратчиси Филадельфиядаги Мустақиллик миллий тарихий боғи яқинида ноқонуний тўхтаб турган BMW автомобилини аниқлаганидан кейин бошланган.
Машина ичидан назоратчи Хорш ва бир аёлни, шунингдек, гиёҳванд моддалар, сохта федерал ҳуқуқ-тартибот идоралари нишонлари ва ўқ-дориларни топган. Офицерларнинг сўзларига кўра, аёлнинг ёнида 2023 йилдан бери бедарак йўқолган бошқа бир филадельфиялик аёл — Блэр Тонзелли номига ёзилган шахсий гувоҳнома ҳам бўлган.
Хорш ҳибсга олинган ва расмийлар унинг уйида тинтув ўтказган. Полиция уйнинг ертўласи ва яширин жойларидан хавфли кимёвий моддалар, баллистик воситалар, марихуана етиштириш ускуналари ва уйнинг сув қувурларига уланган 55 галлонли (тахминан 208 литрли) бочка топганини даъво қилмоқда.
Шунингдек, полиция 1 миллиондан ортиқ рақамли материалларни, жумладан, "ушбу уйда турли ҳолатларда суратга тушган кўплаб одамлар, аёллар"нинг фотосуратлари ва видеоларини қўлга киритди, деб маълум қилди шу ҳафта Филадельфия полиция департаменти тергов бошқармаси комиссари ўринбосари Фрэнк Ваноре.
Полициянинг билдиришича, улкан ҳажмдаги тасвирлар орасида бедарак йўқолган деб хабар берилган 27 ёшли Габриэль Амарандо ва 26 ёшли Марибель Фрессеснинг суратлари ҳам бўлган. Баъзи фотосуратларда улар уйда тирик ҳолда кўринган бўлса, 2017 йилга оид бошқа тасвирларда улар вафот этгандек кўринади.
Қотиллик ишлари бўйича детективлар, шунингдек, яна уч аёлнинг вафот этгандек кўринган фотосуратлари ва видеоларини топишган. Улардан икки нафарининг шахси аниқланган, учинчиси эса номаълумлигича қолмоқда ва унга "Жейн До" деб шартли ном берилган.
Очиқ саҳнали видеолардан бирида аёл кишининг бўғилаётгани тасвирланган бўлиб, бу жиноятни Хоршнинг ушбу уйда яшаган ва ўтган йили вафот этган отаси Раймонд "РС" Хорш содир этгани тахмин қилинмоқда, дейди полиция. Улар аёлнинг шахсини аниқлашган, бироқ унинг исмини ошкор қилишмаяпти.
Полиция катта Хорш ушбу видеоларни суратга олиш ортида турган бўлиши мумкинлигини тахмин қилмоқда, бироқ улар тасвирларнинг қанчалик даражада ҳақиқий жиноятларни акс эттиришига ҳали ҳам ишонч ҳосил қилишмаган.
"Унутмайлик, у фильмлар олаётган эди", деди Ваноре. "Буларнинг баъзилари рол ўйнаш, баъзилари эса ҳақиқий бўлиши мумкин деб ҳисоблаймиз".
Пайшанба кунги ҳолатга кўра, полиция Филадельфиянинг Олни мавзесидаги уйдан топилган далилларга жами етти нафар бедарак йўқолган аёлнинг алоқадорлигини маълум қилди.
Улар: Амарандо, Фрессес, полиция шахсини аниқлаган икки нафар исми ошкор этилмаган аёл, Жейн До, шахсий ҳужжати кичик Хоршнинг машинасидан топилган Тонзелли ва тергов ҳақида билиб, полицияга мурожаат қилган Эми МакХейлдир. Оила аъзоларининг айтишича, МакХейл RC Хорш билан турмуш қурган ва кейинчалик ғойиб бўлган.
Полициянинг билдиришича, топилган тасвирларда жами 58 киши акс этган бўлиб, улардан 25 нафари терговчилар билан ҳамкорлик қилмоқда. Яна 16 нафари полиция томонидан топилган, бироқ улар ҳамкорлик қилишдан бош тортмоқда.
"Улар ушбу уйда нима содир бўлгани ҳақида гапиришни исташмаяпти", деди Ваноре.
Федерал тергов бюроси (ФТБ) ҳам ушбу ишга жалб этилган бўлиб, рақамли далилларни ўрганишда Филадельфия полиция департаменти билан ҳамкорлик қилмоқда. Полиция материалларнинг тахминан 30 фоизини кўриб чиқди.
Южин Хоршнинг рақамли далиллар ва бедарак йўқолган аёлларга алоқадорлиги ҳозирча номаълумлигича қолмоқда. Унга нисбатан ушбу аёллар билан боғлиқ айблов эълон қилинмаган, бироқ у қурол-яроғ ва гиёҳванд моддалар билан боғлиқ оғир жиноятларда айбланиб, федерал ҳибсхонада қолмоқда. У ҳали ўз айбига иқрор бўлгани йўқ.