ФИФА президентини қўллаб-қувватлаётган Қатар ОФКга қарши чиқди

ФИФА президентини қўллаб-қувватловчи Қатар ОФКга қарши чиқди

Қатар футбол ассоциацияси президенти Ҳамад бин Халифа ал-Соний Осиё Футбол Конфедерацияси (ОФК)нинг ФИФА президенти Жанни Инфантинога қарши УЕФА ва КОНКАКАФ билан биргаликда эълон қилган очиқ хатига жавоб қайтарди.

Ал-Соний ОФК президенти Салмон бин Иброҳим ал-Халифага йўллаган мактубида Қатар футбол ассоциацияси ҳам, унинг ўзи ҳам ушбу қўшма баёнот эълон қилинишидан аввал бу масала бўйича маслаҳатлашувларда иштирок этмаганини маълум қилди.

Қатар вакилининг таъкидлашича, баёнотдан олдин унинг лойиҳаси юборилмаган, олдиндан хабар берилмаган ва мазмуни юзасидан фикр билдириш имконияти ҳам тақдим этилмаган.

Ал-Соний ОФКнинг 47 та аъзо ассоциацияси номидан жамоавий позицияни қандай асосда эълон қилганига ҳам изоҳ сўради. Унинг фикрича, умумий позиция аввало барча аъзолар билан маслаҳатлашув орқали аниқланиши керак.

Мазкур можаро Инфантино фаолиятига нисбатан футбол конфедерациялари ўртасидаги келишмовчиликлар кучайган бир пайтда юзага келди. УЕФА, ОФК ва КОНКАКАФ аввалроқ ФИФА президентини истеъфога чиқишга чақириб, унинг Жаҳон чемпионати тижорий ҳуқуқларининг 20 фоизини хусусий инвесторлар учун сотиш режасини кескин танқид қилган эди. Ушбу лойиҳа орқали ФИФА тахминан 4,2 миллиард доллар даромад олишни режалаштирган, бироқ кучли норозиликлардан сўнг Инфантино ундан воз кечган.

Бир кун аввал Қатар ва яна беш араб давлати футбол ассоциацияси раҳбарлари Инфантино фаолиятини қўллаб-қувватлаган эди. Улар ФИФА президентининг футболни глобал миқёсда ривожлантиришга қўшган ҳиссасини юқори баҳолаган.