Фарғонада онаси ва ўгай отасини ўлдирган ака-укадан бири умрбод, иккинчиси 13 йилга қамалди
Фарғонада 27 ва 17 ёшли ака-ука онаси ва ўгай отасини ўлдириб, уйдаги қимматбаҳо буюмларни олиб кетган. Улар кейин яна бир укасини ҳам ўлдиришга уринган. Суд акага умрбод, укага 13 йиллик қамоқ жазосини тайинлади.
Фарғонада онаси ва ўгай отасини ўлдирган ака-укалардан бири умрбод, иккинчиси 13 йилга қамалди
Фарғонада ўз онаси ва ўгай отасини ўлдирган ака-укалар иши бўйича суд қарори ўқилди.
Суд ҳужжатларига кўра, 27 ёшли судланувчи 2009-йилда туғилган вояга етмаган укаси билан олдиндан тил бириктириб, Фарғона шаҳрида онасига тегишли уйни эгаллаш, хонадондаги қимматбаҳо буюмларни қўлга киритиш, шунингдек, онаси, ўгай отаси ва яна бир укасини ўлдириш режасини тузган.
Режага мувофиқ, ака-укалар аввал уйга кирган, улардан бири эса болалар хонасига беркинган. Эр-хотин уйга қайтгач, иккинчи судланувчи ўгай отасига муҳим гапи борлигини айтиб, уни ташқарига олиб чиққан.
Айни пайтда хонага яширинган катта ўғил меҳмонхонада ёлғиз қолган онасига ташланган. У аёлни қўллари ва электр кабели билан бўғиб, кейин шиша идиш билан бошига урган ва уни ўлдирган.
Шундан сўнг у укасига СМС юбориб, режанинг биринчи босқичи якунланганини билдирган. Ука ўгай отасини яна уйга олиб кирган. Ювиниш хонасида яширинган катта ака ошхона пичоғи билан унинг танасининг турли жойларига 12 марта зарба бериб, ўгай отасини ҳам ўлдирган.
Ака-укалар марҳумларни ётоқ диванининг ички қисмига жойлаштириб, қон изларини тозалаган. Сўнг яна бир укасини ҳам ўлдириш мақсадида унинг уйга келишини кутишган.
Кечга яқин хонадонга келган укага икки судланувчи ташланган. Бироқ у акаларига қаршилик кўрсатиб, уйдан қочиб чиққан ва қўшниларни ёрдамга чақирган. Шу боис судланувчилар жиноятни охирига етказа олмаган.
Улар воқеа жойидан қочишдан олдин марҳумларга тегишли телефонлар, пул маблағлари, тақинчоқлар ва бошқа буюмларни олиб кетган.
Жиноят ишлари бўйича Фарғона шаҳар суди вояга етмаган судланувчига Жиноят кодекси 59-моддасининг 3-қисми асосида тайинланган жазоларни қисман қўшиш йўли билан 13 йил муддатга озодликдан маҳрум қилиш жазосини тайинлади. У жазони тарбия колониясида ўтайди.
Иккинчи судланувчига эса Жиноят кодекси 59-моддасининг 4-қисми асосида тайинланган енгилроқ жазони оғирроғи билан қоплаш орқали жиноятлар мажмуи бўйича умрбод озодликдан маҳрум қилиш жазоси тайинланди.
Судда сўз олган судланувчилардан бири қилмишидан пушаймонлигини билдириб, бошқа ёшларга сабоқ бўлишини айтди.
“Ёш-ёш болаларга дарс бўлсин, айниқса, ота-оналарга. Фарзандларига яхши қараб, меҳрибончилик билан муносабатда бўлса, бундай даражага етиб келмайди. Кечиринглар яна бир марта”, — деди у.
Марҳум ўгай отанинг қизи эса унинг фарзандларга муносабати ҳақида гапирди. Унинг айтишича, отаси ўғил фарзандни яхши кўрган ва болаларга нисбатан бундай муносабатда бўладиган инсон эмас эди.
“2025-йил июл ойининг охиридан бирга яшай бошлашган. Шундан бери улар билан алоқамиз бўлмаган. 12-феврал куни вафот этгани ҳақида эшитдим. Билмайман, балки мен ягона қиз фарзанд бўлганим учунми, у ўғил болани жуда яхши кўрарди. Ўғил фарзанди бўлмагани учунми, ўғил болага бундай муомала қиладиган одам эмас эди”, — деди қиз.