Фарғона Хитой билан ҳамкорликда қишлоқ хўжалиги дронларини ишлаб чиқаришни режалаштирмоқда
Жамоатчилик муҳокамаси учун эълон қилинган ҳукумат қарори лойиҳасига кўра, Хитой инвестори ва Фарғона давлат техника университети ҳамкорлигида Фарғона вилоятида дронлар ишлаб чиқариш технологиялари паркини ташкил этиш режалаштирилмоқда.
Фарғонада қишлоқ хўжалиги дронларини ишлаб чиқариш бўйича Хитой билан ҳамкорликда қўшма корхона ташкил этиш режалаштирилмоқда.
Вилоят ҳокимлиги «Эко шаҳар» мажмуасининг саноат зонасидаги 1 гектарлик ер майдонида «ФарПИ Аэроинжиниринг» технопаркини ташкил этиш таклифини илгари сурди. Ушбу майдон Фарғона давлат техника университети қошида фаолият юритади.
Технопарк университет ва хитойлик инвестор томонидан биргаликда таъсис этиладиган «Hongsheng Texnologik Rivojlantirish» компанияси томонидан бошқарилади.
Корхонада қишлоқ хўжалиги дронлари ва уларнинг бутловчи қисмларини ишлаб чиқариш, шунингдек, синовдан ўтказиш, сотиш, сақлаш, техник хизмат кўрсатиш ва таъмирлаш хизматларини йўлга қўйиш кўзда тутилган. Бундан ташқари, у ерда дрон операторлари тайёрланади, уларнинг малакаси оширилади ва қайта тайёрланади ҳамда операторларни сертификатлаш амалга оширилади.
Қарор лойиҳасига кўра, компанияга юридик шахс бўлган қишлоқ хўжалиги маҳсулотлари ишлаб чиқарувчиларга агротехник хизматлар кўрсатиш ҳуқуқи ҳам берилиши мумкин. Унинг дронларидан экинларни мониторинг қилиш, минерал ўғитлар сепиш ва ўсимликларни ҳимоя қилиш воситаларини қўллашда фойдаланилади.
Дронларнинг максимал парвоз баландлиги 30 метрни ташкил этади ва уларни фақат сертификатланган пилотлар бошқариши мумкин бўлади.
Технопарк таркибида қишлоқ хўжалиги дронларини ишлаб чиқариш, сотиш ва сақлаш жойлари, илмий-тадқиқот марказлари, операторларни тайёрлаш масканлари, синов майдончалари ва лабораториялар, шунингдек, логистика ва сервис объектлари бўлиши кутилмоқда.
Ҳужжат лойиҳаси 9 октябрга қадар жамоатчилик муҳокамаси учун очиқ бўлади.