Фарғона вилояти ва Mitsui янги лойиҳаларни муҳокама қилди
Фарғона вилояти ҳокимлиги ва Mitsui & Co. компанияси нефть тармоғи, сув таъминоти, туризм ва бошқа соҳалардаги янги инвестиция лойиҳаларини муҳокама қилдилар.
**Фарғона вилояти ва Mitsui янги лойиҳаларни муҳокама қилди**
Фарғона вилоятида Япониянинг Mitsui & Co., Ltd. компанияси билан инвестициявий ҳамкорликни кенгайтириш масалалари муҳокама қилинди. 4 сентябрь куни вилоят ҳокими Хайрулло Бозоров компаниянинг Ўзбекистондаги ваколатхонаси бош вакили Томо Шинго бошчилигидаги делегация билан учрашув ўтказди.
Музокаралар давомида томонлар Япония технологияларини қўллаган ҳолда янги лойиҳаларни ишга тушириш, шунингдек, Фарғона вилоятида инвестициявий ҳамкорликни кенгайтириш истиқболларини кўриб чиқдилар.
Учрашув иштирокчилари Ўзбекистон ва Япония ўртасидаги стратегик шериклик муносабатлари изчил ривожланиб бораётганини ва икки томонлама ҳамкорлик янги босқичга кўтарилганини таъкидладилар.
Ҳудудлараро алоқаларни кенгайтириш, япон инвесторлари иштирокидаги лойиҳалар сонини кўпайтириш ва янги инвестициявий ташаббусларни қўллаб-қувватлашга алоҳида эътибор қаратилди. Бу йўналишда томонлар делегацияларнинг ўзаро ташрифларига муҳим рол ажратмоқдалар.
Учрашувда Фарғона вилояти Япониянинг илғор тажрибасини жорий этишга алоҳида эътибор қаратаётгани қайд этилди.
Хусусан, таълим соҳасида тажриба тариқасида Япония ўқитиш методикаси жорий этилди. Вилоятдаги олий таълим муассасаларида ҳам мутахассислар тайёрлаш замонавий ёндашувларни қўллаган ҳолда амалга оширилмоқда.
Мицуи & Co., Ltd. — бош қароргоҳи Токиода жойлашган халқаро савдо-инвестиция компаниясидир. У дунёнинг 62 мамлакатида фаолият юритади, унинг Ўзбекистондаги ваколатхонаси эса 1993 йилдан буён ишлаб келмоқда.
Компания энергетика, инфратузилма, транспорт, қишлоқ хўжалиги ва озиқ-овқат саноати, кимё тармоғи, рақамли технологиялар, логистика ва бошқа соҳаларда инвестиция лойиҳаларини амалга оширади.
Музокаралар давомида нефть саноати, сув таъминоти, мева-сабзавот маҳсулотларини қайта ишлаш, инфратузилма, туризм ва таълим соҳаларида қўшма лойиҳаларни амалга ошириш бўйича таклифлар илгари сурилди.
Мицуи & Co. фаолият йўналишларини ҳисобга олган ҳолда, томонлар ҳамкорликни янада фаол ривожлантириш ва истиқболли лойиҳаларни илгари суриш учун чоралар кўришга келишиб олдилар.
Музокараларда, шунингдек, Mitsui & Co., Ltd. компаниясининг Қозоғистондаги ваколатхонаси бош вакили Тўлқинжон Раҳимов ва Фарғона вилояти ҳокимининг биринчи ўринбосари Мирзоҳид Убайдуллаев иштирок этди.