ФАО Фарғона водийсидаги деҳқон ва томорқа хўжаликларининг техник салоҳиятини мустаҳкамламоқда
Бирлашган Миллатлар Ташкилотининг Озиқ-овқат ва қишлоқ хўжалиги ташкилоти (ФАО) Андижон, Наманган ва Фарғона вилоятларидаги деҳқон хўжаликлари ҳамда томорқа ер эгаларига 12 та мотокультиватор ва 12 та қўл пуркагичини топширди. Ускуналар қишлоқ хўжалиги ишларини енгиллаштиришга ва хўжаликларнинг ишлаб чиқариш салоҳиятини мустаҳкамлашга ёрдам беради. Қўллаб-қувватлаш «Фарғона водийсида қишлоқ хўжалигини барқарор ривожлантириш учун Жануб–Жануб ҳамкорлиги ва уч томонлама ҳамкорлик» (UNUN/SEC/028/UND) лойиҳаси доирасида кўрсатилди, […]
ФАО Фарғона водийсидаги деҳқон ва томорқа хўжаликларининг техник салоҳиятини мустаҳкамламоқда
Бирлашган Миллатлар Ташкилотининг Озиқ-овқат ва қишлоқ хўжалиги ташкилоти (ФАО) Андижон, Наманган ва Фарғона вилоятларидаги деҳқон хўжаликлари ҳамда томорқа ер эгаларига 12 та мотокультиватор ва 12 та қўл пуркагичини (опрыскиватель) топширди. Ушбу техника қишлоқ хўжалиги ишларини енгиллаштириш ва хўжаликларнинг ишлаб чиқариш салоҳиятини оширишга қаратилган.
Ёрдам ФАО томонидан Ўзбекистон Республикаси Қишлоқ хўжалиги вазирлиги билан ҳамкорликда амалга оширилаётган «Фарғона водийсида қишлоқ хўжалигини барқарор ривожлантириш учун Жануб–Жануб ва уч томонлама ҳамкорлик» (UNUN/SEC/028/UND) лойиҳаси доирасида кўрсатилди.
Ускуналарни Андижон вилояти Қўрғонтепа туманидаги «Навбаҳор», Наманган вилояти Наманган туманидаги «Бешкапа» ва Фарғона вилояти Фарғона туманидаги «Саноат» маҳаллаларидаги лойиҳа иштирокчилари қабул қилиб олдилар. Ушбу учта маҳалланинг ҳар бирига тўрттадан мотокультиватор ва тўрттадан қўл пуркагичи ажратилди. Бундан ташқари, Қўрғонтепа туманидаги лойиҳа иштирокчиларига бир тонна карбамид етказиб берилди.
Кичик ер майдонларида меҳнат қилаётган деҳқон ва томорқа хўжаликлари учун агротехник тадбирларни ўз вақтида ўтказиш ўта муҳимдир. Мотокультиваторлар ерга ишлов беришни соддалаштириши ва қўл меҳнати ҳажмини камайтириши, пуркагичлар эса ўсимликларни касаллик ва зараркунандалардан ҳимоя қилиш чораларини кўриш имконини бериши кутилмоқда.
«Томорқада ерни экишга тайёрлаш кўп вақт ва меҳнат талаб этади. Мотокультиваторлар ушбу ишни енгиллаштиради ва экмачиликка ўз вақтида тайёргарлик кўришимизга ёрдам беради, деб умид қиламиз», — деди лойиҳа иштирокчиларидан бири Шуҳрат Кенжабоев.
Техника ва ускуналарнинг топширилиши лойиҳанинг маҳаллий даражада билим ва амалий кўникмаларни мустаҳкамлаш бўйича фаолиятини тўлдиради. Сентябрь ва октябрь ойларида Андижон, Фарғона ва Наманган вилоятларида ташкил этилган тренерларни тайёрлаш курсларини 38 нафар иштирокчи муваффақиятли якунлади. Оқув машғулотлари тупроқ ва сув ресурсларини барқарор бошқариш, иқлим ўзгаришига чидамли экинларни етиштириш ҳамда иқлимга мослашган қишлоқ хўжалиги усулларини қўллашга бағишланди.
«Барқарор қишлоқ хўжалиги амалиётларини жорий этиш учун нафақат билим, балки уларни қўллаш имкониятлари ҳам зарур. Олаётган билимларни техника ва ускуналар бериш билан уйғунлаштирган ҳолда, биз деҳқон ва томорқа хўжаликларига иқлим ўзгариши шароитида ишлаб чиқариш салоҳиятини мустаҳкамлашга ёрдам бермоқдамиз», — деб таъкидлади лойиҳа координатори Муҳаммаджон Қосимов.
Лойиҳа Фарғона водийсида иқлим барқарорлигига эга қишлоқ хўжалиги тизимларини ривожлантириш ва қишлоқ аҳолисининг турмуш шароитини яхшилашга қаратилган. Кичик фермер хўжаликлари, кооперативлар ва миллий экспертларнинг билим ва техник салоҳиятини мустаҳкамлаш орқали лойиҳа қишлоқ хўжалигининг иқлим ўзгаришига бардошлилигини оширишга, ишлаб чиқариш самарадорлиги ва иқтисодий натижаларни яхшилашга хизмат қилади.