Фабио Каннаваро — ЖЧдан кейинги тактик ўзгариш, ёш футболчилар ва жамоадаги рақобат ҳақида
Ўзбекистон миллий жамоаси бош мураббийи Фабио Каннаваро Жанубий Кореяга қарши ўйин олдидан ўтказилган матбуот анжуманида жамоада Жаҳон чемпионатидан кейин амалга оширилган тактик ўзгаришлар, ёш футболчиларга бўлган талаб ва рақобат муҳити ҳақида гапирди.
**Фабио Каннаваро — ЖЧдан кейинги тактик ўзгаришлар, ёш футболчилар ва жамоадаги рақобат ҳақида**
Ўзбекистон миллий жамоаси бош мураббийи Фабио Каннаваро Жанубий Кореяга қарши бўлиб ўтадиган ўртоқлик учрашуви олдидан матбуот анжуманида қатнашди. Унда у Жаҳон чемпионатидан кейинги тактик ўзгаришлар, жамоадаги рақобат муҳити ва ёш футболчилар ҳақида фикр билдирди.
Аввалига Каннаваро Жанубий Кореяга яна қайтганидан мамнун эканини айтиб, эртанги баҳс Ўзбекистон учун муҳим эканини таъкидлади. Мураббий Жаҳон чемпионатидан сўнг жамоа таркибида сезиларли ўзгаришлар юз берганини қайд этди.
“Жаҳон чемпионатидан кейин жамоамизда анча ўзгаришлар бўлди, футболчилар таркибида ҳам кўп ўзгаришлар юз берди. Корея терма жамоаси жуда қийин рақиб эканини яхши биламиз ва сафарда унга қарши ўйнаш осон бўлмайди, лекин эртанги ўйинда яхши натижа кўрсатиш биз учун жуда муҳим”, — деди мураббий.
У Жаҳон чемпионатидаги учта мағлубиятдан кейин таркибга ўзгартиришлар киритилгани, жамоага янги тактикалар ва ғоялар сингдиришга ҳаракат қилингани ҳақида гапирди. Унинг сўзларига кўра, Эрон ва Сурия билан сўнгги икки учрашувда футболчилар бу ўзгаришларни майдонда намойиш этиб, ғалабага эришган.
“Жаҳон чемпионатидаги учта мағлубиятдан сўнг таркибда ўзгаришлар қилишга ҳаракат қилдик ва мана охирги иккита ўйинда ғалаба қозондик. Жаҳон чемпионатидан кейин янги терма жамоага янги тактикалар ва ғояларни сингдиришга ҳаракат қилдим, улар Сурия ва Эрон билан ўйинда ўзини яхши кўрсатиб, ғалаба қозонишди” — деди Каннаваро.
Мураббий Жаҳон чемпионатида иштирок этиш футболчилар учун катта тажриба бўлганини ҳам таъкидлади. Унинг фикрича, бундай йирик турнирда қатнашиш футболчиларнинг руҳиятига ҳам таъсир қилади.
“Жаҳон чемпионати биз учун жуда яхши тажриба бўлди. Бу биз учун биринчи марта эди ва менимча, бу бизга кўп нарса берди. Жаҳон чемпионатидан кейин ўйинчиларимга бу даражани сақлаб қолишимиз, ҳар йили ўз устимизда ишлаб, янги-янги, ўзимизга катта мақсадлар қўйишимиз кераклигини айтдим”.
Каннаваро ёш футболчилар ривожига ҳам алоҳида эътибор қаратди. Унинг айтишича, 17 ёшдан 21 ёшгача бўлган футболчи етарлича яхши бўлса, Суперлигадаги кучли жамоаларда ўйнаши керак.
“Мен футболчилар билан ҳам, Ўзбекистон футбол ассоциацияси билан ҳам гаплашганимда ҳар доим айтаман: футболчи 17 ёшдан 21 ёшгача бўлган оралиқда Суперлигадаги топ жамоаларда тўп суриши керак. Чунки бу ёш ўзбек футболчиларининг потенсиалини кўрсатадиган ва уларни терма жамоага чақириш мумкин бўлган давр ҳисобланади” — деди бош мураббий.
Каннаваро Жаҳон чемпионатида уч ҳимоячили тизимдан фойдаланилганини, кейин эса формацияни ўзгартириш ва жамоага янги ўйин фалсафасини сингдириш вақти келганини тушунтирди.
У Ўзбекистон футболида агрессив ўйнаш услуби ёшликдан шакллантирилишини англаганини айтди. Шу сабабли бу хусусиятларни миллий терма жамоа ўйинига ҳам олиб киришга қарор қилган.
“Ўзбекистон футболида агрессив ўйнаш ёшлигидан сингдириб келинади. Ўзбек футболи ёшлари жуда юқори даражада эканини англаб, шу футболни миллий терма жамоага ҳам татбиқ этишга қарор қилдим” — деди Каннаваро.
Мураббий юқори интенсивликда ўйнаш учун жисмоний тайёргарлик зарурлигини ҳам қайд этди. Унинг сўзларига кўра, 90 дақиқа давомида юқори темпни сақлаш осон эмас ва шу сабабли футболчилар билан бу йўналишда Жаҳон чемпионатидан кейин бир йилдан бери ишланмоқда.
Каннаваро Ўзбекистон терма жамоаси бош мураббийи этиб тайинланган дастлабки даврда жамоада кескин ўзгаришлар қилишга шошилмаганини айтди. У футболчиларнинг маданияти, одатлари ва анъаналарини кузатиб, ҳурмат қилган ҳамда Жаҳон чемпионатига чиқишда эришилган натижаларни сақлаб қолишни мақсад қилган.
“Мен бир йил олдин Ўзбекистон терма жамоасига бош мураббий бўлиб келганимда, кўп ўзгаришлар қилишга ҳаракат қилмадим. Аввало, жамоага имкон қадар тегмасдан, бу футболчиларнинг маданияти, одатлари ва анъаналарини кузатиб, ҳурмат қилдим, чунки бу жамоа ажойиб натижалар билан Жаҳон чемпионатига чиққан эди” — деди Каннваро.
Унинг айтишича, Жаҳон чемпионатидан кейин формация билан бирга жамоанинг ўйин фалсафаси ва модели ҳам ўзгартирила бошланган. Бироқ мураббий ўзбек футболчиларининг курашувчанлиги, жанговар руҳи ва қарши ҳужумга ўтишдаги кескинлигини сақлаб қолишга ҳаракат қилган.
Каннаваро эртанги ўйинда ҳам аввалги икки учрашувдаги каби яхши натижа кўрсатиш мақсад қилинганини айтди. У прессинг ва юқори интенсивликни қачон ҳамда қандай қўллаш муҳимлигини таъкидлади.
“Олдинги икки ўйиндаги прессинг ва интенсивликни қачон ва қандай қилиш жуда муҳим. Агар буни ҳар доим, вақтини билмасдан қилсангиз, 90 дақиқа давомида яхши ўйин кўрсатиш қийин бўлиши мумкин”.
Мураббийнинг таъкидлашича, у миллий терма жамоа бош мураббийи сифатида бир йил ишлаган даврида футболчиларни яхшироқ тушуна бошлаган, футболчилар ҳам унинг талабларини яхшироқ англай бошлаган. Шу асосда жамоа билан маълум даражада алоқа ўрнатилиб, тактик ўзгаришлар амалга оширилмоқда.
Каннаваро терма жамоада соғлом рақобат бўлиши зарурлигини ҳам қайд этди. Унинг айтишича, доим бир хил 13−14 нафар футболчи ўйнаса, рақобат йўқолади. Шу сабабли ёш футболчиларни жалб қилиш орқали жамоада рақобат муҳитини сақлашга ҳаракат қилинмоқда.
“Менимча, терма жамоада соғлом рақобат ва дўстона кураш бўлиши керак, шундагина биз яхши натижаларга эришиб, ривожланишда давом этамиз. Агар терма жамоада доим бир хил 13−14 нафар футболчи ўйнаса, рақобат йўқолади”.
Каннаваро жамоани ёш футболчиларга таянган ҳолда мотивация ва ўзгаришлар асосида шакллантиришни режалаштираётганини айтди. У Кореяга қарши баҳсда ҳам аввалги икки ўйиндаги ижобий натижаларни давом эттириш учун майдонга тушишларини билдирди.
Эслатиб ўтамиз, Ўзбекистон миллий жамоаси Жанубий Кореяга қарши учрашуви 6-октабр куни Тошкент вақти билан 16:00 да бўлиб ўтади.