Эрон президенти Пизишкиён АҚШ билан урушни зудлик билан тугатишга чақирди
Эрон бугунги кунда кучли геосиёсий мавқега эга. Шу боис ҳозир Яқин Шарқдаги зиддиятни манфаатли шартлар асосида якунлаш имконияти бор, деб ҳисоблайди мамлакат президенти Масъуд Пизишкиён.
Эрон Президенти Пизишкиён Қўшма Штатлар билан зудлик билан урушни тўхтатишга чақирди.
Пизишкиённинг таъкидлашича, "Уруш қайсидир нуқтада тугаши керак. Энг яхшиси, уни бугун – биз кучли мавқеда бўлган, ҳурматга сазовор ва бутун дунё ғалабамизни тан олаётган бир пайтда якунлашдир".
Президент Эрон ўзининг камчилик ва нуқсонларини инкор этмаслигини, бироқ Теҳрон мамлакатни бирликда олға силжитишга интилаётганини қайд этди.
Август ойи бошида Масъуд Пизишкиён АҚШни томонлар 18-июн куни имзолаган ўзаро англашув меморандумига риоя қилишга мажбурлашга чақирган эди. Сиёсатчининг қўшимча қилишича, ҳужжатнинг амалга оширилиши мамлакат, минтақа ва Эрон иттифоқчилари хавфсизлигини мустаҳкамлайди.
Вашингтон ва Теҳрон меморандум имзолаганидан сўнг, томонлар бўлажак тинчлик шартномасининг тафсилотлари бўйича 60 кунлик музокараларни бошлади. Бироқ июл ойи бошида ўзаро ҳужумлар қайта тикланди. Кейинроқ Эрон меморандумга риоя қилишдан бош тортганини тасдиқлади, АҚШ президенти Доналд Трамп эса Конгрессни Эрон билан уруш қайта бошлангани ҳақида хабардор қилди.