Эрон клублари Қатар ва БАА жамоаларига қарши ўйинларни нейтрал майдонларда ўтказади
Эрон клублари Қатар ва БАА жамоаларига қарши ўйинларни бетараф майдонларда ўтказади.
Осиё Элит Чемпионлар Лигасининг гуруҳ босқичига қуръа ташланди. Унга кўра, Эроннинг “Истиқлол” ва “Трактор” клублари Қатар ҳамда Бирлашган Араб Амирликлари вакилларига қарши ўз уй учрашувларини нейтрал майдонларда ўтказади.
Минтақадаги хавфсизлик ва зиддиятларга қарамай, Теҳроннинг “Истиқлол” ва Табризнинг “Трактор” жамоалари БААнинг “Ал-Айн”, “Ал-Васл” ва “Шабаб Ал-Аҳли” ҳамда Қатарнинг “Ал-Гарафа”, “Ас-Садд” ва “Ал-Шамал” клублари билан бир гуруҳдан жой олди.
Минтақадаги ҳарбий вазият сабабли феврал ойида Эрон ички чемпионати тўхтатилган эди. Ўтган дам олиш кунлари мусобақа қайта тикланди, бироқ айрим ўйинлар ёпиқ эшиклар ортида ёки мухлислар сонига чеклов қўйилган ҳолда ўтказилмоқда.
Осиё Элит Чемпионлар Лигасининг янги мавсуми 14-сентабр куни старт олади. Мусобақа ҳар бири 16 тадан жамоадан иборат Ғарбий ва Шарқий минтақавий зоналарга бўлинган бўлиб, жамоалар уй-сафар тизимида баҳс олиб боради. Ҳар бир гуруҳдан энг яхши 8 та жамоа нимчорак финалга йўл олади. Чорак финалдан бошлаб барча ҳал қилувчи учрашувлар Саудия Арабистонида ўтказилади. Мусобақанинг финал баҳси эса 1-майга белгиланган.
Маълумот учун, АҚШ ва Исроил феврал ойида Эронга ҳужум қилгач, расмий Теҳрон ўз базаларидан зарбалар беришга йўл қўйгани учун Қатар ва БАА ҳудудларидаги нишонларга ўт очганини маълум қилган ва буни қасос деб атаганди. Қўшни давлатлар Теҳрондан ҳужумларни тўхтатишни сўраган.