Эрон АҚШга Ҳурмуз бўғозини очиш шартларини маълум қилди
Эрон АҚШдан урушни якунлаш, музлатилган активларни қайтариш ва минтақадаги ҳарбий ҳаракатларни тўхтатишни талаб қилмоқда.
Эрон АҚШга Ҳурмуз бўғозини очиш учун қўйиладиган шартларни маълум қилди. Бу ҳақда Пресс ТВ хабар берди.
Эрон Хавфсизлик кенгаши котиби Муҳсин Резоийнинг сўзларига кўра, Теҳрон Вашингтонга воситачилар орқали Ҳурмуз бўғозини очиш учун бажарилиши лозим бўлган шартларни етказган.
Резоийнинг таъкидлашича, Теҳрон АҚШдан урушни тугатиш, Эроннинг музлатилган активларини қайтариш, шунингдек, бутун минтақада, жумладан, Ливан ва Ғазо секторида ҳарбий ҳаракатларни тўхтатишни талаб қилмоқда.
Эрон Хавфсизлик кенгаши котиби АҚШ ўз сиёсатини ўзгартириб, Теҳрон таклифларини қабул қилмагунча, бўғоз очилмаслигини билдирди.
Аввалроқ Эрон парламенти Миллий хавфсизлик қўмитаси Ҳурмуз бўғози орқали кемалар ҳаракатини тартибга солишни назарда тутувчи янги қонун лойиҳасини маъқуллаган эди. Ушбу ҳужжатда АҚШ ва Исроил кемаларининг бўғоз орқали ўтиши тақиқланиши кўзда тутилган.
Хабарда келтирилган маълумотларга кўра, июн ойи ўрталарида Вашингтон ва Теҳрон тинчлик келишувини тузиш жараёнини бошлаши керак бўлган меморандумни имзолаган. Бироқ уч ҳафта ўтиб, томонлар яна можарони кескинлаштиришга ўтган.
Август ойи бошида Доналд Трамп кутилаётган келишув муносабати билан Эронга қарши навбатдаги ҳужумлар тўлқини бекор қилинганини маълум қилди.
Шунингдек, у Ҳурмуз бўғози яқин вақт ичида очилиши кераклигини билдириб, бу шарт бажарилмаса, ҳужумларни қайта бошлаш билан таҳдид қилди.