“Эрон АҚШ олдида тиз чўкмайди” — Пезешкиён БМТда нутқ сўзлади

“Эрон АҚШ олдида тиз чўкмайди” — Пезешкиён БМТда нутқ сўзлади

Эрон президенти Масъуд Пезешкиён 23-сентябр куни БМТ Бош ассамблеясида сўзга чиқиб, Ислом Республикаси АҚШ босимига бўйсунмаслигини айтди ва Теҳроннинг Ҳормуз бўғозида жорий этган чекловларини қўллаб-қувватлади.

Пезешкиён Вашингтоннинг санксиялари ҳамда кучайиб бораётган босими Эроннинг қаршилигини янада оширишини таъкидлади.

“(АҚШ президенти Доналд Трамп) санксиялар, босим ортиши ва таҳдидлар қаршисида Эрон халқининг қаршилиги фақатгина ошишини билиши керак. Биз ҳеч қачон бош эгмаймиз ва тиз чўкмаймиз”, деди у.

### Ҳормуз бўғозидаги вазият ва музокаралар

Пезешкиён Теҳроннинг Ҳормуз бўғозидаги позициясини ҳимоя қилиб, бу стратегик сув йўлидан Эронга қарши ҳужумларда фойдаланишга рухсат берилмаслигини айтди.

Дунёга етказиб бериладиган нефт ва газнинг катта қисми ўтадиган Ҳормуз бўғози урушни якунлаш бўйича саъй-ҳаракатларда марказий мавзуга айланган. Эрон Вашингтон ҳарбий босимни юмшаца ва Эрон портлари блокадасини олиб ташласа, сув йўлини қайта очиши мумкинлигига ишора қилмоқда.

Эрон давлат телевидениесига кўра, Теҳрон музокарачилар орқали Ҳормуз бўғозини очиш шартларини етказган. Улар орасида АҚШнинг денгиз қамалини бекор қилиш, музлатилган Эрон активларини озод қилиш ва ҳарбий ҳаракатларни барча фронтларда тўхтатиш бор.

### Эрон ўзини терроризм қурбони деб атади

Пезешкиён Эрон ҳеч қачон уруш бошламаганини билдирди. У Трампнинг Теҳронга нисбатан терроризм ҳақидаги айбловларини рад этиб,

“Эроннинг ўзи терроризм қурбони бўлди”, дея таъкидлади.

Пезешкиён БМТ минбаридан туриб собиқ олий раҳнамо Оятуллоҳ Али Хоманаий ва уруш пайтида мактабга қилинган ҳужумда ҳалок бўлган эронлик мактаб ўқувчиларининг суратларини кўрсатди. АҚШ делегацияси Пезешкиённинг нутқи вақтида зални тарк этди.

Куни кеча Трамп БМТ минбаридан туриб барча давлатларни Халқаро жиноий суддан чиқишга чақирганди.