Эрисссон Ўзбекистонда 5Г тармоқларини ривожлантиришга қизиқиш билдирди
Швециянинг Эрисссон телекоммуникация компанияси Ўзбекистонда 5Г тармоқларини ривожлантириш ва алоқа инфратузилмасини модернизация қилиш бўйича маҳаллий мобил операторлар билан ҳамкорлик имкониятларини муҳокама қилди. Компания делегациясининг йил охиригача Ўзбекистонга ташрифини ташкил этишга келишиб олинди.
Эрисссон Ўзбекистонда 5Г тармоқларини ривожлантиришга қизиқиш билдирди
«Дунё» ахборот агентлиги хабарига кўра, бу масалалар Ўзбекистон Инвестициялар, саноат ва савдо вазирлиги ҳамда Рақамли технологиялар вазирлиги вакилларининг Эрисссон раҳбарлари билан онлайн учрашувида муҳокама қилинган.
Музокараларда компаниянинг Жанубий Европа ва Евроосиё бўйича раҳбари Андреа Миссори ҳамда Марказий Осиё ва Озарбойжон бўйича раҳбари Айдин Абжанбеков қатнашган.
Эрисссон вакиллари Ўзбекистонни стратегик жиҳатдан муҳим бозорлардан бири деб ҳисоблашини ва мамлакатдаги фаолиятини кенгайтиришдан манфаатдор эканини билдирган. Ҳамкорликнинг эҳтимолий йўналишлари сифатида 5Г тармоқлари, радиоалоқа тизимлари ва таянч телекоммуникация инфратузилмасини янгилаш тилга олинган.
Компания мобил тармоқлар учун аппарат ва дастурий ечимлар, шунингдек, рақобатбардош тижорий шартларни таклиф қилишга тайёрлигини маълум қилган. Зарурат туғилса, халқаро молия институтларини жалб этган ҳолда молиялаштириш механизмлари ҳам кўриб чиқилиши мумкин.
Ўзбекистон томони мамлакат телекоммуникация бозори хорижий компаниялар ва инвесторлар учун очиқлигини таъкидлаган.
Келишувга мувофиқ, 2026-йил охиригача Эрисссон делегациясининг Ўзбекистонга ташрифи ташкил этилиб, тегишли вазирликлар ва маҳаллий мобил операторлар билан музокаралар ўтказилиши режалаштирилган.