Энергорегулятор газ бозори билан шуғулланади, Энергетика вазирлиги индивидуал рухсатномалар бериш ҳуқуқидан маҳрум бўлади
Энергетика бозорини ривожлантириш ва тартибга солиш агентлигининг ваколатлари табиий ва суюлтирилган газга кенгайтирилмоқда. 2028 йилдан бошлаб у тартибга солинадиган тарифлар ва тўловларни тасдиқлайди. Шу билан бирга, Энергетика вазирлиги бундан буён алоҳида корхоналар ва истеъмолчиларга индивидуал рухсатномалар бера олмайди.
Энергорегулятор газ бозори билан шуғулланади, Энергетика вазирлиги индивидуал рухсатномалар бериш ҳуқуқидан маҳрум бўлади
Ўзбекистон Энергетика бозорини ривожлантириш ва тартибга солиш агентлигининг ваколатлари энди табиий ва суюлтирилган газга ҳам татбиқ этилади. Бу президентнинг 22 сентябрдаги фармонида назарда тутилган.
Ҳужжатга кўра, энергорегулятор зиммасига электр энергияси, табиий ва суюлтирилган газ бозорларини тартибга солиш ва уларда бозор тамойилларини босқичма-босқич шакллантириш вазифалари юклатилади.
Шу пайтгача регулятор фаолияти асосан электр энергияси бозорига қаратилган эди. Фармон унинг ваколатлари газ соҳасига ҳам кенгайтирилишини расман мустаҳкамлайди.
Ҳужжатга иловада агентлик фаолиятининг асосий йўналишлари белгилаб берилган. Хусусан, у электр энергияси, табиий ва суюлтирилган газ бозорларида рақобатни ривожлантиришга кўмаклашиши ҳамда талаб ва таклиф мувозанатини таъминлаши керак.
Регулятор, шунингдек, бозор иштирокчилари учун тенг ва шаффоф шароитларни ҳамда рақобат тўғрисидаги қонунчиликка риоя этилишини назорат қилади.
Бундан ташқари, унинг ваколатларига ушбу бозорлар иштирокчиларини лицензиялаш ва лицензия талабларига риоя этилишини назорат қилиш, шунингдек, электр энергиясини ишлаб чиқариш, узатиш ва тақсимлашда технологик йўқотишларни ҳисоблаш методикаларини тасдиқлаш киради.
2028 йилдан бошлаб регулятор электр энергияси, табиий ва суюлтирилган газ таъминоти соҳаларида тартибга солинадиган тарифлар ва тўловларни тасдиқлаши, истеъмолчилар ҳуқуқлари ҳимоя қилинишини назорат қилиши ва уларнинг мурожаатларини кўриб чиқишнинг самарали тизимини жорий этиши лозим.
Яна бир ўзгариш Энергетика вазирлиги ваколатларига тегишли. Фармон билан идора томонидан ёқилғи-энергетика тармоғи корхоналари ва истеъмолчиларга шартномавий муносабатлар, хизматлар кўрсатиш ва бошқа хўжалик масалалари бўйича индивидуал хусусиятга эга рухсатномалар бериш амалиёти бекор қилинади.
Бундан ташқари, чора-тадбирлар режасида ёқилғи-энергетика тармоғида давлат хизматларини, жумладан, техник шартларни бериш ва келишиш тартиб-таомилларини соддалаштириш назарда тутилган.
Бунинг учун ушбу жараёнларни тўлиқ проактив форматга ўтказиш ва Вазирлар Маҳкамасига киритиш учун тегишли ҳужжат лойиҳасини тайёрлаш режалаштирилган.
Ҳужжатда, шунингдек, энергетика соҳасининг норматив-ҳуқуқий базасини қайта кўриб чиқиш ва тармоққа бозор механизмларини янада жорий этиш назарда тутилган. Хусусан, халқаро консультантларни жалб қилган ҳолда электр энергияси, табиий ва суюлтирилган газ бозорларида рақобатни таъминлаш қоидаларини ишлаб чиқиш кўзда тутилган.
Эслатиб ўтамиз, фармон билан Ўзбекистонда йирик истеъмолчилар учун электр энергиясининг табақалаштирилган тарифлари ҳам ўзгартирилди. Соат 9:00 дан 17:00 гача улар учун камайтирувчи коэффициент қўлланилади — тариф 1,5 баравар пасаяди. Тунда эса аввалги чегирма бекор қилинади ва электр энергияси учун одатий тариф бўйича тўлов амалга оширилади.