Энергия учун тўловлар бўйича ёрдам «етарлича узоққа бормайди»
Уест-Мидлендсдаги оилалар қишки энергия тўловларини тўлашдан хавотирда эканликларини айтмоқдалар.
Энергия тўловлари бўйича ёрдам «етарли эмас»
Икки фарзанднинг онаси Келли Биркетт ҳукуматнинг бюджет бўйича баёнотидан сўнг уларнинг «аҳволи яхшиланмаслигини» айтди
Уэст-Мидлендсдаги хонадонлар бюджет эълон қилинганидан сўнг, таклиф қилинаётган ёрдам етарли бўлмаслигидан хавотирланиб, ҳукуматдан энергия тўловлари масаласини яна бир бор кўриб чиқишни сўрашмоқда.
Молия вазири Жон Хили турмуш даражаси нархини жиловлашга қаратилган кенгроқ чора-тадбирлар пакетининг бир қисми сифатида 100 фунт стерлинг миқдоридаги «хонадонлар учун энергия тўлови»ни ва газ учун доимий абонент тўловини бекор қилиш бўйича келажакдаги режани эълон қилди.
Минтақадаги оилалар BBC га берилган ёрдам учун «миннатдор» эканликларини, аммо қишда молиявий аҳволларидан хавотирда эканликларини айтишди.
Реддитчлик шахсий ҳисобчи Келли Биркетт шундай деди: «100 фунт стерлинг яхши, лекин у қадар катта сумма эмас. У шунчаки оилалар кун кечириш учун тўлаши керак бўлган бошқа ҳамма нарсанинг ичида сингиб кетади».
Турмушга чиққан ва икки фарзанднинг онаси бўлган Биркеттнинг айтишича, унинг оиласи Бюджет эълон қилинганидан кейин нималарни тежаш ҳақида аллақачон ўйламоқда.
«Биламан, 100 фунт учун бироз ношукур бўлиб кўринаётгандирман ва бундай бўлишни хоҳламайман. Мен асло ношукур эмасман», деди у.
«Аммо реалликда аҳволимиз ҳеч ҳам яхшиланмади. Ҳарорат тушиб кетаётгани сабабли исссиқлик тизимини ёқишга мажбур бўлишимизни биламиз, болалар совуқда қолиши мумкин эмас.
Иситиш масаласига келганда бироз тежамкорроқ бўлишга ҳаракат қиламиз, лекин бу аксарият оилаларни (қишда) хавотирга соладиган нарса эканлиги аниқ».
Молия вазири Жон Хили Бюджет оилаларга «эркин нафас олиш имконини» беришини айтди
Олстерлик автобус ҳайдовчиси Марк Самнернинг айтишича, у ва аёли собиқ уйларини қисман энергия тўловлари каби тўпланиб қолган эски қарзларни узиш учун сотишган.
У BBC га «энергия бўйича қарздорликка» ботиб қолганликларини ва олдиндаги қишдан хавотирда эканликларини айтди.
«Тўловларимиз яна ошишини биламиз, ҳар сафар ошиш вақти келганда унинг қанча бўлишини ўйлаб ваҳимага тушасиз», деди у.
«Мен энди болаларимни бирор нарса ейиш учун ташқарига жуда камдан-кам олиб чиқаман ва дўконларда сарфлайдиган нарсаларимизга жуда эҳтиёткормиз.
Ҳукумат эълон қилган нарса фойдали. Ношукур бўлишни хоҳламайман, шунинг учун бу биз учун фойдали дейман, лекин бу эҳтимол (тўловларнинг) фақат бир ойини қоплайди, холос.
Шундай қилиб, бу кичик ёрдам, лекин етарли эмас».
Ҳукуматнинг билдиришича, Бюджетда белгиланган чора-тадбирлар, жумладан, ёқилғи божини музлатиш, энг кам иш ҳақини 3,9 фоизга ошириш ва ISA инвестиция суғуртаси бўйича 20 000 фунт стерлинглик солиқдан озод қилинган лимитни камайтириш режаларидан воз кечишдан «миллионлаб оилалар» наф кўради.
Молия вазири Жон Хили энергия бўйича эълон қилинган баёнот ҳукумат оилаларни қўллаб-қувватлаш учун қилаётган ишларнинг «фақат кичик бир қисми» эканини айтди.
«Яқин Шарқ ва Европадаги низолар бу ердаги оилаларга кундалик харажатларнинг ошиши орқали таъсир қилмоқда», деди у.
«Биз глобал воқеаларни назорат қила олмаймиз, лекин ўзгариш қилишимиз мумкин бўлган жойда ҳаракат қила оламиз».
Газ бўйича доимий абонент тўловини бекор қилиш учун аниқ сана белгиланмаган, аммо Ғазначилик буни 2027 йилда ёки «ундан кейин имкон қадар тезроқ» қилишга ваъда берган.
Электр энергияси тўловлари бўйича АҚС (ҚҚС) ни камайтириш муддати апрель ойида тугаши керак эди, энди у келаси йилнинг июлигача узайтирилади.