Эксперт Тошкент ҳавосидаги PM2.5 заррачалари массасини тахминан бир тоннага тенг деб баҳолади

Эксперт Тошкент ҳавосидаги PM2.5 заррачаларининг массасини тахминан бир тоннага тенг деб баҳолади

Температура инверсияси пайтида, агар инверсия қатлами баландлиги тахминан 200 метрни ташкил этса, Тошкент ҳавосида бир тоннага яқин майда дисперсли PM2.5 заррачалари бўлиши мумкин. Кучсиз шамолда бундай заррачалар ёмонроқ тарқалади ва ер юзаси яқинида тўпланиб, ифлослантирувчи моддалар концентрациясини оширишга қодир.

Бу ҳақда Экология ва атроф-муҳитни муҳофаза қилиш илмий-тадқиқот институти Атмосфера ҳавосини муҳофаза қилиш лабораторияси мудири, техника фанлари доктори Зикрилла Алимов маълум қилди. Унинг баҳолашича, сентябрь ва октябрь ойларида ҳаво ифлосланишида табиий чангнинг улуши 30–70 фоизга, ёниш маҳсулотлари, жумладан, транспорт, энергетика ва иссиқхоналар чиқиндилари эса 30–50 фоизга етиши мумкин. Яна 5–10 фоизи транспорт ва металлургия чангларига тўғри келиши мумкин.

Алимов ифлосланиш манбаларининг нисбати об-ҳаво шароити ва шамол йўналишига қараб ўзгаришини таъкидлади. Унинг сўзларига кўра, PM2.5 концентрациясини камайтириш учун чиқиндиларнинг аниқ манбаларини аниқлаш ва илмий маълумотлар асосида чоралар кўриш зарур.

Шунингдек, Тошкентда PM2.5 заррачалари концентрацияси 2026 йил бошидан буён ўтган йилнинг шу даврига нисбатан 25 фоизга камайгани хабар қилинмоқда. Экология қўмитасида буни "Тоза ҳаво" дастури амалга оширилаётгани билан боғлашмоқда.