Дунёнинг энг серқатнов контейнер портлари эълон қилинди
Шанҳай 2025-йил якунлари бўйича кетма-кет 16-марта дунёнинг энг серқатнов контейнер порти бўлди. У иккинчи ўриндаги Сингапурни 10 миллион ТЕУдан зиёд ортда қолдирган. Дунёнинг энг йирик саккиз контейнер портининг барчаси Шарқий ёки Жануби-шарқий Осиёда жойлашган.
Дунёнинг энг серқатнов контейнер портлари маълум қилинди
Ҳажмлар ТЕУ — 20 футлик, яъни тахминан 6,1 метр узунликдаги стандарт контейнерга тенг шартли бирликда ҳисобланди. Статистикага юкланган ҳам, бўш контейнерлар ҳам киритилди.
Шанҳай портининг контейнер айланмаси АҚШнинг энг йирик контейнер порти — Лос-Анжелес кўрсаткичидан беш баробардан ҳам ошган.
Рейтингдаги 30 портнинг умумий контейнер айланмасининг қарийб ярми Хитой портлари ҳиссасига тўғри келган. Бу ҳисобга 13 миллион ТЕУ кўрсаткичига эга Ҳонконг ҳам киритилган.
Шанҳай порти фақат шаҳарнинг ўзига хизмат қилмайди. Ички сув йўллари ва темирйўллар уни Янсзи дарёси бўйидаги саноат марказлари билан боғлайди. Шу орқали Хитойнинг марказий ва шарқий ҳудудларидаги ишлаб чиқарувчилар ўз маҳсулотларини хорижий бозорларга чиқаради.
Ишлаб чиқаришнинг Осиёдаги бошқа мамлакатларга ҳам кенгайиши ва Хитойнинг Жануби-шарқий Осиё билан савдо алоқаларининг мустаҳкамланиши минтақавий юк ташиш тармоқларини ривожлантирмоқда. Бу жараёнда Хитой портлари муҳим ўрнини сақлаб қолмоқда.
Сингапурнинг порт модели эса кўпроқ халқаро денгиз йўналишларини бир-бирига боғлашга асосланган. У дунёдаги 600 дан ортиқ порт билан алоқага эга.
Бу ерда контейнерлар бир кемадан бошқасига ўтказилиб, сўнг манзили сари йўл олади. Шу маънода Сингапурни йўловчилар бошқа рейсга ўтадиган транзит аеропортга қиёслаш мумкин. Юкларни қайта ортишга асосланган бу тизим кичик шаҳар-давлатнинг дунёда иккинчи ўринга чиқишига ёрдам берган.
Чуқур сувли причаллар ва автоматлаштирилган электр кранлар янги терминалларга энг йирик контейнер ташувчи кемаларни қабул қилиш имконини беради.
Сингапур Туас портини қуриш орқали қувватини яна кенгайтирмоқда. Лойиҳа контейнер операцияларини бир жойга жамлашни назарда тутади. Уни 2040-йилларда тўлиқ якунлаш режалаштирилган бўлиб, шундан сўнг портнинг йиллик ўтказиш қуввати 65 миллион ТЕУ га етиши кутилмоқда.