Дунёнинг энг инновацион мамлакатлари аниқланди
2026-йилги Глобал инновациялар индексида Швейсария биринчи ўринни эгаллади. Швеция ва АҚШ етакчи учликка кирган бўлса, Хитой Германия, Япония ва Франсияни ортда қолдириб, ўнинчи поғонадан жой олди.
Дунёнинг энг инновацион давлатлари маълум қилинди
Жаҳон интеллектуал мулк ташкилоти — ВИПО тузган рейтингда 139 та мамлакат ва иқтисодиёт 79 та кўрсаткич асосида баҳоланган.
Швейсария 66,7 балл билан пешқадам бўлган. Швеция 63,2 балл, АҚШ эса 62,3 балл тўплаган. Жанубий Корея тўртинчи, Сингапур бешинчи ўринни эгаллаган.
Индекс инновацион салоҳиятнинг беш йўналишини баҳолайди: институтлар сифати, инсон капитали ва илмий тадқиқотлар, инфратузилма, бозорнинг ривожланганлиги ҳамда бизнеснинг ривожланиш даражаси. Яна икки гуруҳ кўрсаткич билим ва технологиялар соҳасидаги ютуқлар ҳамда ижодий натижаларни акс эттиради.
Европа мамлакатлари биринчи 25 таликдаги 14 та ўринни, етакчи ўнталикда эса олтита поғонани эгаллаган. Уларнинг барчаси юқори даромадли иқтисодиётлар тоифасига киради.
Еврокомиссиянинг 2026-йилги Европа инновациялар таблосига кўра, ЕИнинг инновацион кўрсаткичлари 2019-йилдан буён ўсиб келмоқда. Бироқ ВИПО Европа олдида илмий ютуқлар ва саноат салоҳиятини тез ўсувчи компанияларга айлантириш вазифаси турганини таъкидлаган.
Бизнесни кенгайтириш учун маблағ топиш, меҳнат унумдорлигини ошириш ва рақамли кўникмаларга эга мутахассисларни тайёрлаш ҳам муҳим масалалар бўлиб қолмоқда. Сунъий интеллект каби технологиялар кенгайгани сари малакали кадрларга эҳтиёж янада ортмоқда.
Осиёдаги етакчилар турли натижаларни намойиш этган. Хитой умумий рейтингда 57 балл билан ўнинчи ўринда турган бўлса-да, инновацияларга йўналтирилган ресурслар бўйича 22-ўринни, инновацион натижалар бўйича эса бешинчи ўринни эгаллаган.
Бу фарқ Хитойнинг инновацион натижалар бўйича мавқеи ресурслар кўрсаткичларидаги ўрнидан анча юқори эканини кўрсатади.
Ҳиндистон, Ветнам, Филиппин ва Индонезия ҳам сезиларли ўсиш қайд этган. Ўрта даромадли ушбу мамлакатлар 2013-йилдан буён рейтингдаги ўринларини анча яхшилаган.
Бирлашган Араб Амирликлари эса 25-ўринни эгаллаб, илк бор етакчи 25 таликка кирган. Саудия Арабистони, Қатар ва Кувайт ҳам 2026-йилда ўз мавқеини яхшилаган.
Форс кўрфазидаги бу давлатлар учун асосий вазифалардан бири — катта инвестициялар, ривожланган инфратузилма ва давлат институтлари имкониятларини аниқ илмий-техник ҳамда ижодий натижаларга айлантиришдир.