Дунёнинг биринчи рақамли теннисчиси йилнинг энг муҳим турнирини ўтказиб юборади
Дунёнинг биринчи рақамли теннисчиси Янник Синнер ўнг тиззасидаги жароҳати туфайли йилнинг сўнгги “Катта Дубулға” мусобақаси – УС Опен турнирида иштирок эта олмайди. Бу ҳақда спортчи ўзининг ижтимоий тармоқдаги саҳифасида маълум қилди.
Синнернинг сўзларига кўра, у жамоаси ва тиббий ходимлар билан биргаликда тикланиш учун кўп ҳаракат қилган. Бироқ Монте-Карлодаги машғулотлардан сўнг тиззаси тўлиқ тикланмаган ва шу сабабли мусобақада қатнашмасликка қарор қилган.
“Жамоам ва тиббий штабим билан бирга тикланиш учун кўп меҳнат қилдик. Аммо бу йилги УС Опенъда иштирок эта олмайман. Сўнгги кунларда Монте-Карлода машғулотларни давом эттирдик. Аммо ўнг тиззам ҳали тўлиқ тикланмади ва бунинг учун менга яна вақт кераклигини айтишди”, дея ёзди Синнер.
Шунингдек, дунёнинг биринчи рақамли теннисчиси бу қарордан ранжиганини таъкидлади: “Бу қарордан жуда хафа бўлдим. Ню-Ёрк мен учун алоҳида аҳамиятга эга. У ерга қайтиб, мухлислар қаршисида кортга чиқишни жуда кутгандим”.
25 ёшли теннисчи июл ойида “Уимблдон” финалида Александр Зверевни мағлуб этиб, фаолиятидаги бешинчи “Катта дубулға” турнири чемпионлигини қўлга киритган эди. Шундан сўнг у жароҳати сабаб Монреал ва Синсиннати турнирларида ҳам иштирок эта олмади.
Янник Синнер 2019-йилги УС Опен турниридаги дебютидан буён илк бор “Катта дубулға” турнирини ўтказиб юбормоқда.
Янник Синнернинг асосий рақиби, дунёнинг иккинчи рақамли теннисчиси Карлос Алкарас эса ўнг билагидаги жароҳат сабаб апрел ойидан буён кортга чиқмаган бўлса-да, АҚШдаги “Катта дубулға” туркумига кирувчи турнирда иштирок этишга тайёрлигини билдирган. Испаниялик спортчи “Уимблдон” ҳамда “Ролан Гаррос” мусобақаларини ўтказиб юборган эди.
Маълумот учун, Синнер 2026-йилда 44 та ғалаба ва 3 та мағлубият қайд этиб, олтита турнирда бош совринни қўлга киритди. Бундан ташқари, италиялик теннисчи “Катта дубулға” турнирларида беш бор зафар қучган. У Аустралиан Опен мусобақасида икки марта (2024, 2025), УС Опен турнирида бир марта (2024) ва “Уимблдон”да бир марта (2025, 2026) бош совринни қўлга киритган. Шунингдек, Синнер Италия терма жамоаси билан 2023 ва 2024-йилларда Девис Кубоги ғолибига айланган.
Маълумот учун, УС Опен мавсумдаги тўртинчи “Катта дубулға” турнири ҳисобланади. Мусобақа 23-августдан 13-сентябргача АҚШнинг Ню-Ёрк шаҳрида бўлиб ўтади. Амалдаги чемпион испаниялик Карлос Алкарас ҳисобланади ва у 2025-йилги финалда Янник Синнерни 6:2, 3:6, 6:1, 6:4 ҳисобида мағлуб этган.