Дунё нефт савдоси: энг йирик экспортчилар қайси давлатлар?
2025-йилда АҚШ нефт ва нефт маҳсулотларининг ялпи экспорти бўйича дунёда биринчи ўринни эгаллади. Мамлакатнинг кунлик экспорт ҳажми 10,7 миллион баррелни ташкил этган. Кейинги ўринларни Саудия Арабистони ва Россия банд қилган.
Дунё нефт савдоси: энг йирик экспортчилар қайси давлатлар?
Ҳисоб-китобларга хом нефт, жумладан, газ конденсати ҳамда нефт маҳсулотлари ҳам киритилган. Кўрсаткичлар ялпи экспортни ифодалайди — улардан импорт ҳажми айирилмаган. Шу боис умумий ҳажмга реекспорт ва транзитдаги нефт ҳам қўшилиши мумкин.
Энг йирик беш экспортчи
Рейтингдаги етакчи давлатларнинг кунлик экспорт ҳажми қуйидагича:
- АҚШ — 10,7 миллион баррел;
- Саудия Арабистони — 7,9 миллион баррел;
- Россия — 6,6 миллион баррел;
- Канада — 4,1 миллион баррел;
- Бирлашган Араб Амирликлари — 3,9 миллион баррел.
АҚШ ва Саудия Арабистони биргаликда дунё нефт экспортининг қарийб чорагини таъминлаган. Дастлабки уч давлатнинг жами улуши эса 33 фоизга етган.
Нашр АҚШнинг етакчилигини асосан сланец нефти қазиб олишнинг тез ривожланиши билан изоҳлаган. Горизонтал бурғилаш ва қатламни гидравлик ёриш технологиялари зич тоғ жинсларидан кўпроқ нефт олиш имконини берган. 2015-йилда нефт экспортига қўйилган аксарият чекловларнинг бекор қилиниши эса америкалик ишлаб чиқарувчиларнинг ташқи бозорларга чиқишини кенгайтирган.
Рейтингда нефт маҳсулотлари ҳам ҳисобга олингани сабабли йирик нефтни қайта ишлаш ва савдо марказлари юқори ўринларни эгаллаши мумкин. Нидерландия ва Сингапурнинг йирик экспортчилар сафида бўлиши қисман шу омил билан изоҳланади.
Минтақалар орасида Яқин Шарқ етакчи
Яқин Шарқнинг нефт ва нефт маҳсулотлари экспорти кунига 22,4 миллион баррелни ташкил этган. Бу жаҳон экспортининг 29,2 фоизига тенг.
Кейинги ўринда Европа бўлиб, унинг кунлик экспорти 16,1 миллион баррелга, жаҳон ҳажмидаги улуши эса 21 фоизга етган. Шимолий Америкада бу кўрсаткичлар мос равишда 15,7 миллион баррел ва 20,5 фоизни ташкил этган.