Дунё бўйлаб 2025-йилда 7 мингта гуманоид робот сотилди
Дунё бўйлаб 2025-йилда 7 мингта гуманоид робот сотилди
Реутерс Халқаро робототехника федерацияси (ИФР) маълумотларига таянган ҳолда хабар беришича, 2025-йилда дунё бўйлаб саноат ва профессионал хизматлар учун мўлжалланган қарийб 7 мингта гуманоид робот сотилган.
ИФР мезонларига кўра, гуманоид робот — бу одамлар учун мўлжалланган муҳитда автоном ишлай оладиган ва одамсимон ташқи кўринишга эга роботдир. Оёқларнинг бўлиши шарт эмас.
Ҳозирча гуманоид роботлар савдоси анъанавий робототехника бозори ҳажмидан анча кичик. 2024-йилда дунёда қарийб 542 мингта саноат роботи сотилган бўлса, транспорт, меҳмонхона бизнеси ва тозалаш соҳалари учун хизмат кўрсатувчи гуманоид роботлар савдоси қарийб 199 минг донани ташкил этган.
ИФР бош котиби Сюзанна Биллернинг айтишича, 2025-йилда сотилган гуманоид роботларнинг кўпи ишлаб чиқаришда ишлатилмаган, балки маълумот йиғиш ва сунъий интеллект моделларини яхшилаш учун тадқиқот институтлари ҳамда компаниялар томонидан харид қилинган.
Гуманоид роботларни илк жорий эта бошлаган автомобил заводларида аллақачон тажриба лойиҳалари йўлга қўйилган. Биллернинг сўзларига кўра, айрим ҳолатларда корхоналар бир нечта ёки ўнлаб шундай роботлардан фойдаланмоқда.
Реутерсънинг аввалги хабарларига кўра, Хитой регуляторлари Пекин учун устувор бўлган технологик йўналишлардан бири атрофидаги шов-шувни камайтириш мақсадида гуманоид робот ишлаб чиқарувчи заводларнинг биржага чиқиш режаларини чеклай бошлаган.
Назоратнинг кучайиши, хусусан, Унитрее Роботисс аксияларининг кескин кўтарилиб, тез орада пасайиб кетиши ортидан юз берди. Август ойида аксиялар беш баравардан кўпроққа қимматлашган, бироқ кейинчалик ўзининг энг юқори қийматидан 55 фоизга арзонлашган.