Дунё бўйлаб саёҳатга чиққан кема Эрондаги уруш сабаб тўхтаб қолди
Вилла Вие Одйссей круиз кемаси дунё бўйлаб сафарини тўхтатди ва юзлаб йўловчиларни Камбоджага туширди. Кема оператори АҚШнинг Эрон билан уруши фонида ёқилғи нархи ошгани сабабли саёҳатни давом эттира олмаслигини маълум қилди.
27-октабр куни лайнер эгаси бўлган Американинг Вилла Вие Ресиденсес компанияси фаолиятини қайта ташкил этишини билдирди. Йўловчилар учун соҳилда «вақтинча яшаш жойлари» қидирилиши бошланган.
Феврал ойида уруш бошланганидан кейин ёқилғи сарфини камайтиришга ҳаракат қилинган — жумладан, лайнер тезлигини пасайтириш ва портларда тўхташларни кўпайтириш орқали. Аммо бу чоралар нархлар «фавқулодда» ошишини қоплашга ёрдам бермаган. Вилла Вие Ресиденсес маълумотларига кўра, Осиёнинг айрим ҳудудларида бир каюта учун ёқилғи харажатлари ойига 1,8 минг доллардан 8 минг долларгача ошган. Натижада компания энди қоплай олмайдиган зарарларга дуч келди.
Вилла Вие Одйссей — 755 кундан буён дунё бўйлаб саёҳатни амалга ошираётган лайнер. Кема 2024-йил октабрида Шимолий Ирландиянинг Белфаст шаҳридан йўлга чиққан ва ўтган вақт мобайнида дунёнинг 147 мамлакатида бўлган. Йўловчиларга дунё бўйлаб «узлуксиз» саёҳат ваъда қилинганди. Уларга бортдаги каюталарни узоқ муддатга ижарага олиш ёки ҳатто доимий яшаш учун 120 мингдан 440 минг долларгача бўлган нархларда сотиб олиш таклиф қилинган.
Лайнер бортида ресторанлар, кафе ва барлар, клуб ҳамда консерт майдони, кутубхона, бизнес-марказ, ҳовуз, фитнес-марказ, спа-салони, ўйинлар учун майдон, шунингдек, кичик тиббиёт маркази ҳам бор.
Кема жами 650 кишига мўлжалланган. Аммо, Камбоджа расмийларига кўра, Сиануквил шаҳридаги портга келганида унинг бортида 203 нафар йўловчи ҳамда экипажнинг 156 нафар аъзоси бор эди. Айрим йўловчилар аллақачон мамлакатдан учиб кетишган, бошқалари эса лайнер сузишни давом эттиришидан умид қилиб Камбоджада қолмоқда.