“Диплом эмас, тажриба муҳим”: 8 тилни биладиган 25 ёшли Ҳожимурод ҳикояси.

“Диплом эмас, тажриба муҳим”: 8 тилни биладиган 25 ёшли Ҳожимуроднинг ҳикояси.

Сурхондарё вилояти Бойсун туманидан бўлган Ҳожимурод Шоймардонов сўнгги етти йил давомида хорижда яшаб, турли мамлакатларда ишламоқда. Россиядан Болгариягача, Туркиядан Малайзиягача бўлган иш тажрибаси унга хизмат кўрсатиш, меҳнат миграцияси ва таълим соҳаларида ўз фикрларини шакллантириш имконини берди. Kun.uz мухбири билан суҳбатда у чет элдаги ҳаётнинг қийинчиликлари ва Малайзиядаги фаолияти ҳақида сўзлаб берди.

Ҳозирда минглаб ўзбекистонликлар хорижда яхши даромад излаб кетмоқда. Ба'зилари қурилишда, бошқалари ишлаб чиқаришда, яна кимдир хизмат кўрсатиш соҳасида меҳнат қилади. Аммо кўплаб ҳолларда одамлар фақат топилган пулга э'тибор қаратади. Ўша маблағ ортидаги масъулият, руҳий босим ва тажриба зарурияти кўзга ташланмайди. Ҳожимуроднинг ҳикояси эса бундай қарашларни бироз ўзгартириши мумкин.

25 ёшли Ҳожимурод мактабни тамомлагач, олий таълимга кира олмайди. Бир муддат санъат соҳасида фаолият юритиб, овозлаштириш билан шуғулланади. Бироқ, унинг айтишича, ўша пайтда бу соҳада барқарор даромад топиш қийин бўлган.

“Санъатга қизиқишим кучли эди, дубляж билан шуғулланардим. Аммо вақт ўтиши билан фақат қизиқиш билан яшаб бўлмаслигини тушундим. Оилага таянч бўлиш, барқарор даромад топиш керак эди. Шу сабаб ўзимни бошқа соҳада синаб кўришни бошладим,” – дейди у.

Шундан сўнг, Ҳожимурод ўз қизиқишларига мос бошқа йўналишда ишлашни бошлайди. Аммо маҳаллий меҳнат бозоридаги маошлар унинг кутилмаларига жавоб бермайди. Натижада хорижда ишлашга қарор қилади. Дастлабки манзили Россия бўлади. У дастлаб оддий ищи сифатида меҳнат қилади, рус тилини яхши билгани туфайли кейинчалик логистика компаниясига ишга таклиф этилади.

“Дастлаб бошқа мигрантлар сингари оддий жисмоний меҳнатдан бошладим. Ўша давр менга интизом ва масъулиятнинг аҳамиятини ўргатди. Иш жараёнида рус тилини эркин билишим эътиборга тушди ва кўп ўтмай логистика компаниясидан таклиф олдим. Бу ерда ҳужжатлар билан ишлаш, юк ташиш занжирини мувофиқлаштириш, турли миллат вакиллари билан мулоқот қилиш каби вазифаларни бажардим. Ўшанда бир нарсани аниқ англадим: хорижда фақат меҳнаткаш бўлишнинг ўзи етарли эмас, тил билиш ва янги кўникмаларни эгаллаш инсонни оддий ищидан мутахассис даражасига олиб чиқадиган энг муҳим омиллардан бири экан,” – дейди у.

Россиядаги фаолиятидан сўнг, Ҳожимурод Болгария, Озарбойжон, БАА ва Туркияда ҳам ишлаб, турли соҳаларда тажриба орттиради. Ҳозирда эса Малайзияда хизмат кўрсатиш соҳасида фаолият юритмоқда. Унинг айтишича, турли мамлакатларда ишлаш касбий тажриба билан бир қаторда, одамлар, маданият ва меҳнатга бўлган муносабатни чуқурроқ англаш имконини ҳам берган.

Ҳозирда Ҳожимурод ўзбек, рус, тожик, араб, форс, инглиз, ҳинд ва урду тилларида эркин мулоқот қила олади. Бироқ бу қобилият бир кунда шаклланмаган. Ҳар бир тилни ўрганиш ортида юзлаб соатлик меҳнат, хатолар ва мунтазам машқ ётади. Айнан шу меҳнат кейинч