ДҲЛ АҚШдан 416 млн евро бож пулини қайтариб олди
Германия компаниялари АҚШга божхона тўловлари сифатида тўлаган 790 млн евродан ортиқ маблағни қайтариб олди. Энг катта сумма - 416 млн евро ДҲЛ логистика компаниясига тўғри келган. 2026-йил охиригача немис компанияларига қўшимча маблағлар қайтарилиши кутилмоқда.
ДҲЛ АҚШдан 416 миллион евро миқдоридаги божхона тўловларини қайтариб олди. Бу ҳақда Дие Вирцчафцвоче ишбилармонлик журнали хабар берди. Журнал маълумотларига кўра, Германия компанияларига АҚШга аввал тўланган 790 миллион евродан ортиқ божхона тўловлари қайтарилган.
Маблағларнинг қайтарилишига 2026-йил феврал ойида АҚШ Олий судининг Доналд Трамп маъмурияти томонидан жорий этилган қўшимча тарифларни ноқонуний деб топгани сабаб бўлган.
Немис компаниялари орасида энг катта суммани ДҲЛ логистика компанияси олган – унга 416 миллион евро қайтарилган. Компания бу маблағларни ўз мижозларига қайтаришни режалаштирмоқда.
Бошқа йирик немис компаниялари ҳам сезиларли миқдорда маблағларни қайтариб олган. Тиббий ускуналар ишлаб чиқарувчи Сиеменс Ҳеалтҳинеерс 200 миллион евродан сал кўпроқ маблағни, спорт кийимлари ва поябзаллари ишлаб чиқарувчи Пума 49 миллион еврони, лаборатория ускуналари ишлаб чиқарувчи Сарториус 26 миллион еврони, тиббий ускуналар ва шахсий ҳимоя воситалари ишлаб чиқарувчи Дрäгер эса 22 миллион евро божхона тўловларини қайтариб олган.
Дие Вирцчафцвоче таъкидлашича, ҳозиргача қайтарилган 790 миллион евродан ортиқ маблағ якуний рақам эмас. Баъзи Германия компаниялари ҳали компенсация олмаган ва тўловлар 2026-йил охиригача амалга оширилишини кутмоқда. Хусусан, Адидас 214 миллион евродан 257 миллион еврогача маблағни қайтариб олишни режалаштирмоқда. ДҲЛ ҳам қўшимча компенсация олишни кутмоқда.
Умуман олганда, АҚШ ҳукумати 2025-йил октабридан 2026-йил июл ойи охирига қадар хорижий компанияларга қарийб 85 миллиард евро божхона тўловларини қайтарган. АҚШ божхона хизмати баҳоларига кўра, яна 25 миллиард евродан ортиқ маблағ қайтарилиши керак. Таққослаш учун, 2024-йил октабридан 2025-йил июн ойи охиригача Вашингтон хорижий компанияларга 4,5 миллиард евродан сал камроқ маблағ қайтарган эди.
2026-йил 20-февралда АҚШ Олий суди Трампнинг ўнлаб савдо ҳамкорларига, жумладан Европа Иттифоқи давлатларига кенг кўламли божлар жорий этишда президентлик ваколатларидан четга чиққан, деган қарорга келган. Трамп тарифларни жорий этишда 1977-йилда қабул қилинган Халқаро фавқулодда иқтисодий ваколатлар тўғрисидаги қонунга (ИЕЕПА) таянган эди. Суд эса деярли барча мамлакатлардан импорт қилинадиган товарларга белгиланган "ўзаро" тарифлар, шунингдек, Канада, Мексика ва Хитой товарларига қўйилган 25 фоизлик божларни ноқонуний деб топган.
Трамп Олий суд қарорини кескин танқид қилиб, уни "чуқур хафсала пир қилувчи" қарор деб атаган. Шундан сўнг Трамп 10 фоизлик янги божларни жорий қилган. Бироқ май ойида Ню-Ёркдаги АҚШ Халқаро савдо масалалари бўйича федерал суди бу тарифларни ҳам ноқонуний деб топган.