Депутатлар капитал бозори бўйича янги қонун қабул қилди
Қонун лойиҳаси капитал бозорида янги молиявий воситаларни жорий этиш ва инвесторлар ҳуқуқлари ҳимоясини кучайтиришни назарда
Депутатлар капитал бозори ҳақидаги янги қонунни маъқуллади.
Олий Мажлис Қонунчилик палатасининг навбатдаги йиғилишида "Капитал бозори тўғрисида"ги қонун лойиҳаси биринчи ўқишда қабул қилинди.
Таъкидланишича, ушбу ҳужжат капитал бозорини халқаро меъёрлар асосида ривожлантириш, унинг шаффофлигини ва инвестициявий жозибадорлигини оширишга қаратилган. Шунингдек, замонавий молиявий воситаларни жорий этиш ҳамда инвесторлар ҳуқуқларини ҳимоя қилиш тизимини мустаҳкамлаш кўзда тутилган.
Лойиҳада капитал бозорининг ҳуқуқий асосларини такомиллаштириш, иштирокчилар учун янада қулай ва ишончли муҳит яратиш ҳамда маҳаллий ва хорижий сармояларни жалб этиш имкониятларини кенгайтиришга алоҳида эътибор қаратилган.
Қонун лойиҳаси билан капитал бозорида бир қатор янги молиявий воситаларни жорий этиш таклиф қилинмоқда. Улар қаторида сукук, барқарор ривожланиш облигациялари, қопланган облигациялар ҳамда секюритизацияланган облигациялар мавжуд.
Шунингдек, корпоратив бошқарув сифатини ошириш ва компаниялар томонидан ахборотни ошкор қилиш бўйича талабларни кучайтириш назарда тутилган.
Ҳужжатда капитал бозори инфратузилмасини такомиллаштириш, бозор иштирокчилари фаолияти учун замонавий ҳуқуқий механизмларни шакллантириш ҳам муҳим вазифалардан бири сифатида белгиланган.
Қонун лойиҳаси қабул қилиниши натижасида молиялаштириш имкониятларини кенгайтириш, замонавий инвестиция воситаларини жорий этиш ва инвесторлар ҳуқуқларини янада ишончли ҳимоя қилишга эришиш мақсад қилинган.