Деградацияга учраган ерларни тиклаш учун йилига 355 миллиард доллар керак бўлади - БМТ
Бирлашган Миллатлар Ташкилоти маълумотларига кўра, ҳозирда ерларни тиклаш бўйича глобал мажбуриятларни бажариш учун ажратилаётган умумий инвестициялар миқдори тахминан 77 миллиард долларни ташкил этади. Бу эса 278 миллиард долларлик тафовутни юзага келтиряпти.
БМТ маълумотларига кўра, 2030-йилга қадар ерларни тиклаш бўйича глобал мажбуриятларни амалга ошириш учун ҳар йили 355 миллиард доллар талаб этилади.
Ҳозирги кунда умумий инвестициялар тахминан 77 миллиард долларни ташкил этиб, бу йиллик молиявий етишмовчиликни 278 миллиард долларга етказмоқда. Хусусий сектор томонидан ажратилаётган маблағлар глобал ерларни тиклашга йўналтирилган умумий маблағнинг атиги 6 фоизини ташкил этади.
Айни пайтда, яйлов ерларини тиклаш бўйича ташаббус бошланган бўлиб, у 1,2 миллиард долларлик 45 та лойиҳани ўз ичига олади. Бу Чўлланишга қарши кураш конвенсияси тарихидаги яйлов ерларини қўллаб-қувватлаш учун ресурсларни сафарбар этиш бўйича энг йирик ташаббус ҳисобланади.
Шунингдек, ҳукуматлар, тараққиёт банклари, жамғармалар ва компаниялар беш қитъадаги 23 та мамлакатда, жумладан, турли ривожланиш босқичларидаги лойиҳалар учун 1,3 миллиард долларлик молиялаштириш портфелини эълон қилдилар. Ушбу сумманинг 644,5 миллион доллари янги молиялаштиришдир.
БМТнинг таъкидлашича, ҳозирда 70 дан ортиқ мамлакатда қурғоқчиликни бошқариш бўйича миллий режалар мавжуд. Бироқ, молиялаштириш ҳажми ва амалий ҳаракатлар муаммони ҳал қилишга мутаносиб эмас.
Ерларнинг 40 фоизигача деградацияга учраган бўлса-да, мамлакатлар 2030-йилга бориб 1 миллиард гектардан ортиқ майдонни тиклашга ваъда берган.