Данияда 36 та квартира 3Д-принтер ёрдамида қурилди
Даниянинг Холстебро шаҳрида 3Д-босма технологияси ёрдамида қурилган Сковспорет талабалар турар жой мажмуаси битказилди. Лойиҳа муаллифлари уни Европада шу технология асосида барпо этилган энг йирик турар жой мажмуаси деб атамоқда. Унда жами 36 та квартира мавжуд.
Данияда 36 та квартира 3Д-принтер ёрдамида бунёд этилди.
Сковспорет лойиҳаси САГА Спасе Арчитесц архитектура бюроси томонидан 3ДСП ва СОБОД компаниялари билан ҳамкорликда ишлаб чиқилган.
Мажмуа Холстебро шаҳрида жойлашган бўлиб, маҳаллий университет кампуси учун арзон турар жойлар қуриш билан шуғулланувчи ташкилот буюртмаси асосида барпо этилган.
Мажмуа олтита бир қаватли бинодан иборат бўлиб, уларда жами 36 та квартира жойлашган. Бинолар орасида ички ҳовлилар, яшил боғлар, пиёдалар йўлаклари ва велосипедлар учун турар жойлар ташкил этилган.
Қурилишда атроф-муҳитга таъсирни камайтиришга ҳам алоҳида эътибор қаратилган. Хусусан, қурилиш майдонида аввалдан ўсиб турган дарахтларнинг 90 фоизини сақлаб қолишга муваффақ бўлинган.
Биноларнинг асосий деворлари СОБОД БОД3 3Д-принтери ёрдамида қурилган. У махсус сементга ўхшаш қоришмани сопло орқали қатламма-қатлам чиқариб, квартираларнинг асосий деворларини шакллантирган.
Қурилиш майдонида 3Д-босма жараёнини назорат қилиш учун атиги уч киши етарли бўлган. Мутахассислар тажриба орттиргани сари қурилиш тезлиги ҳам сезиларли даражада ошган.
Масалан, олтита квартирадан иборат биринчи бинони 3Д-принтерда босиб чиқариш учун бир неча ҳафта талаб қилинган бўлса, худди шундай ҳажмдаги сўнгги бино атиги беш кунда босиб чиқарилган.
Бироқ мажмуа тўлиқ 3Д-принтерда тайёрланмаган. Деворларни босиб чиқариш жараёни тугагач, анъанавий қурувчилар ишни давом эттирган. Улар том, эшик ва деразаларни ўрнатган, шунингдек, хоналарни яшаш учун зарур жиҳозлар ва мебел билан таъминлаган.
Ҳар бир квартиранинг майдони 40 квадрат метрдан 50 квадрат метргача. Улар мустақил яшаш учун мўлжалланган бўлиб, ҳар бирида алоҳида ошхона, иш зонаси, меҳмонхона, ҳаммом ва ухлаш жойи мавжуд.
Архитекторлар хоналарга табиий ёруғлик кўпроқ тушишига ҳам эътибор қаратган. Шу мақсадда квартираларда кўплаб деразалар ва том орқали ёруғлик туширадиган махсус конструксиялар ўрнатилган.
3Д-босмада материал қатламма-қатлам ётқизилиши сабабли бетон деворларда ўзига хос ғадир-будур кўриниш пайдо бўлади. Интерерда бу хусусиятни юмшатиш учун ёғоч, пробка ва гипсокартонга ўхшаш материаллардан фойдаланилган.