Ситроëн 2СВ хетчбекини тақдим этди
Афсонавий Ситроëн 2СВ ўзининг илк модели пайдо бўлганидан деярли 80 йил ўтиб замонавий қиёфада қайта жонланди. Франсуз компанияси йиғиладиган том, юмалоқ фаралар ва минималист интерьерга эга ихчам электромобилни намойиш қилди.
Ситроëн 2СВ хетчбекини намойиш этди
Париж автосалонида Ситроëн компанияси афсонавий 2СВ руҳида яратилган шаҳар электр автомобили консептини тақдим қилди. Янги модел асл нусхадан ҳам ихчамроқ бўлиб чиқди. Электромобилнинг узунлиги 3,7 метрни ташкил этади, тарихий ўтмишдоши эса 3,8 метр бўлган. Автомобил вазни тахминан 1 минг кг.
Консептнинг ташқи дизайнида классик 2СВ моделига хос белгилар сақлаб қолинган: алоҳида ўрнатилган юмалоқ фаралар, бўртиб турувчи ойна тозалагичлар ва йиғиладиган матоли том. Шу билан бирга, автомобил ЛЕД оптика, 19 дюймли пўлат дисклар ва қора рангдаги орқа эшик билан жиҳозланган. Кузов панеллари имкон қадар содда ишланган, бамперлар эса таъмирлаш харажатларини камайтириш мақсадида бўлакли қилиб тайёрланган.
Салонига комикс услубидаги графикага эга 8 дюймли сенсорли экран ўрнатилган. Шу билан бирга, функсияларнинг бир қисми жисмоний тугмалар орқали бошқарилади. Яна бир ўзига хос жиҳати — портатив динамик сифатида ҳам ишлатиш мумкин бўлган ечиладиган Радиоëн радиоси.
Двигателнинг техник хусусиятлари ва юриш захираси ҳозирча ошкор этилмади. Ситроëн электромобил ишлаб чиқаришни Европада йўлга қўйишни режалаштирмоқда. Серияли версиянинг тақдимоти 2028-йилга — оригинал Ситроëн 2СВ моделининг 80 йиллигига мўлжалланган. Янги моделнинг тахминий нархи 15 минг евро (2026-йил октабр ҳолатига кўра тахминан 200 млн сўм) бўлади.