“Чўнтагимга героин солиб қўйишди” – Самарқандда Россия армиясига ёлланган йигит суд залидан қамоққа олинди
Каттақўрғонлик 27 ёшли йигит ишлаш мақсадида Россияга бориб, наркожиноятда айбланган ва 12 йилга қамалган. Сўнгра қамоқхонада Россия фуқаролигини бериш ва жазодан озод қилиш эвазига Украинага қарши урушга боришга кўнган. У судда наркотик савдоси билан шуғулланмаганини, чўнтагига героин солиб қўйиб, кейин ҳужжат расмийлаштиришганини айтган.
“Чўнтагимга героин солиб қўйишди” – Самарқандда Россия армиясига ёлланган йигит суд залидан қамоққа олинди
Самарқандда Россия армиясига ёлланган йигитга нисбатан жиноий жазо қўлланди.
Суд қарорига кўра, Каттақўрғон шаҳрида яшовчи 27 ёшли А.Х. 2023-йилда ишлаш ва пул топиш мақсадида Россияга борган. Кейин у наркотик моддалар савдосида айбланиб, ушланган ва қамалган. Жазони ўтаётган пайтда Россия қуролли кучлари билан шартнома тузиб, Украинага қарши урушга боришга рози бўлган.
А.Х. судда наркотик модда савдосида ноҳақ айбланганини, икки ойлик қийноқлардан кейин айбловни тан олишга мажбур бўлганини айтган.
“Таксичилик қилиб юрган вақтимда машинамга Надежда исмли қиз чиқди. Манзилга олиб кетаётганда суҳбатлашиб кетиб, унинг телефон рақамини олдим. Шундан кейин Надежда билан танишиб, гаплашиб юрдик.
2023-йил тахминан 13-октабр куни Надежда қўнғироқ қилиб, Владивосток шаҳрига олиб бориб келишимни сўради. Розилик бериб, унинг олдига бордим. Манзилга қараб йўлга чиқдик. Дўкондан сигарет ва сув олдим. Тахминан 1-2 км юрганимдан сўнг чекиш учун йўл четида тўхтадим. Надежда билан бирга сигарет чекиб турганимизда, фуқаролик кийимидаги икки киши келиб, бизни ерга йиқитди ва устимизга чиқиб олди.
Надежданинг чўнтагидан 15 грамм героин олишди. Сўнг ўша героинни менинг ҳам чўнтагимга солиб қўйиб, гўёки ёнимдан наркотик модда топилгандек видеога олишди ҳамда ҳужжатларни расмийлаштиришди.
Суд 2023-йил октабрдан 2025-йил март ойигача давом этди. Жиноят ишлари бўйича Владивосток шаҳар судининг ҳукми билан 12 йил муддатга озодликдан маҳрум қилиш жазоси тайинланди”, деган А.Х. ўз кўрсатмасида.
Шундан сўнг уни Красноярск шаҳридаги жазони ижро этиш муассасасига олиб боришган. Жазони ўтаётган даврда Россия мудофаа вазирлигининг масъул ходимлари Украинага қарши урушда қатнашса, Россия фуқаролиги берилиши, жазо муддатидан озод этилиши, шунингдек катта миқдорда пул тўланишини ваъда қилишган.
А.Х. 2025-йил 9-декабр куни Украинага қарши урушда иштирок этишга розилик билдирган ва бир йиллик шартнома имзолаган.
“Мени ва яна 20 нафар турли миллат вакилларини ҳарбий машинага чиқаришди. 1 сутка йўл юриб, ҳарбий аеропортга бордик. Самолётда учиб, Ростов шаҳрига етиб келдик. У ерда бизни бошқа ҳарбийлар кутиб олишди. Мен ва 65 нафар шахсни ажратиб олиб, ҳарбий машинага чиқаришди ҳамда ҳарбий полигонга олиб боришди.”