Чирчиқда поликлиникага ишга киритиш эвазига 500 доллар пора сўраган бош ҳамшира судланди

Чирчиқда поликлиникага ишга киритиш учун 500 доллар пора сўраган бош ҳамширага ҳукм чиқарилди

Тошкент вилоятининг Чирчиқ шаҳрида бир фуқарони поликлиникага ишга жойлаштириб қўйиш эвазига 500 доллар талаб қилган бош ҳамшира суд томонидан жазоланди.

Маълум бўлишича, аёл 2025-йил ноябридан бери Чирчиқ шаҳар тиббиёт бирлашмасига қарашли оилавий поликлиникалардан бирида бош ҳамшира сифатида ишлаб келган. Жорий йил 25-июн куни ушбу муассасага бир фуқаро ҳамшира бўлиб ишга кириш ниятида келган. Бош ҳамшира уни бош шифокор ҳузурига олиб кириб, ўзи хонадан чиқиб кетган.

Иш сўраб келган фуқаро бош шифокор билан суҳбатдан чиққач, бош ҳамшира унга Чирчиқ шаҳар тиббиёт бирлашмаси бошлиғи орқали стоматолог ҳамшираси лавозимига ишга киритиб қўйишни ваъда қилган. Бунинг эвазига у 500 доллар сўраган. Кейинроқ томонлар 400 долларга келишиб олган.

Аёл бу ҳолат бўйича ҳуқуқни муҳофаза қилувчи органларга мурожаат қилган. Эртаси куни улар пул олди-бердиси учун Чирчиқ шаҳридаги хусусий клиникалардан бирининг олдида учрашган. Бош ҳамшира келишилган пулни олаётган пайтда тезкор тадбир ўтказаётган ходимлар томонидан ашёвий далиллар билан қўлга олинган.

Суд жараёнида аёл ўз айбини тўлиқ тан олган. Унинг айтишича, фуқарони ишга жойлаштириш масаласида тиббиёт бирлашмаси бошлиғи билан келишмаган ва олинган маблағни унга бериш ҳақида ҳам гаплашмаган.

Чирчиқ шаҳар суди аёлни Жиноят кодексининг тегишли моддалари билан айбли деб топиб, унга 2 йил 2 ой озодликни чеклаш жазосини белгилаган. Шунингдек, у икки йил давомида давлат ва нодавлат тиббиёт муассасаларида бош ҳамшира лавозимида ишлаш ҳуқуқидан маҳрум қилинган.