Чирчиқда 17 ёшли йигит Россиядан келган, гашиш солинган жўнатмани олаётганда ушланди
Чирчиқда 17 ёшли ўқувчи Россиядан юборилган ва ичига 852,2 грамм гашиш яширилган жўнатмани қабул қилиб олаётганда ушланди, дея хабар берди Божхона қўмитаси. Гиёҳвандлик воситаси тўртта консерва қутисига жойланган, унинг қора бозордаги баҳоси қарийб 600 минг долларга тенг деб баҳоланмоқда.
Чирчиқда 17 ёшли йигит Россиядан келган, гашиш солинган жўнатмани олаётганда қўлга тушди
Тошкент вилоятининг Чирчиқ шаҳрида 17 ёшли мактаб ўқувчиси Россиядан юборилган, ичида 852,2 грамм гашиш бўлган жўнатмани қабул қилиб олаётган пайтда ушлангани ҳақида Ўзбекистон Божхона қўмитаси маълум қилди.
Мазкур тезкор тадбир Божхона қўмитасининг Контрабандага қарши курашиш бошқармаси томонидан Давлат хавфсизлик хизмати ва Ички ишлар вазирлиги тузилмалари билан ҳамкорликда “халқаро назорат остида етказиб бериш” амалиёти доирасида амалга оширилди.
Идора маълумотига кўра, 2009-йилда туғилган вояга етмаган шахс Россиядан келган посилкани олаётган вақтда қўлга олинган.
Холислар иштирокида жўнатма очиб кўрилганда, гиёҳвандлик моддаси тўртта консерва қутиси ичига яширилгани маълум бўлди. Олинган гашишнинг умумий оғирлиги 852,2 граммни ташкил этди.
Кейинчалик ўсмирнинг яшаш манзили кўздан кечирилганда, ҳуқуқ-тартибот органлари ходимлари электрон тарози, кичик зип-пакетлар ва изолента борлигини ҳам аниқлади. Божхона қўмитасига кўра, бу буюмлар гиёҳвандлик моддаларини қадоқлаш ва тарқатишда ишлатилган бўлиши мумкин. Барча ашёлар далил сифатида олиб қўйилди.
Қўмита билдиришича, мусодара қилинган гашиш миқдори 60 мингдан ортиқ дозага тенг, унинг қора бозордаги қиймати эса қарийб 600 минг долларга баҳоланмоқда.
Божхона қўмитаси ота-оналарни фарзандлари ижтимоий тармоқларда кимлар билан мулоқот қилаётгани ва бўш вақтларини қандай ўтказаётганига янада эътиборли бўлишга чақирди. Мазкур ҳолат юзасидан жиноят иши қўзғатилди.