“Челси” Энсо учун “Манчестер Сити”дан қанча талаб қилаётгани маълум бўлди — Романо
“Челси” Энсо Фернандес учун “Манчестер Сити”дан қанча сўраётгани маълум бўлди — Романо
Машҳур инсайдер Фабрицио Романонинг ижтимоий тармоқлардаги саҳифаси орқали хабар берилишича, Лондоннинг “Челси” клуби ярим ҳимоячи Энсо Фернандеснинг трансфери бўйича музокараларни якунлаш учун 14-август, жума куни Британия вақти билан соат 17:00 ни сўнгги муддат этиб белгилади.
Манбага кўра, агар ушбу муддатгача клублар келишувга эриша олмаса, трансфер амалга ошмайди. 25 ёшли аргентиналик футболчини ўз сафига қўшиб олмоқчи бўлган жамоалардан унинг учун 140,5 миллион евролик соф таклиф юбориш талаб этилади.
Хабарда айтилишича, ҳозирда “Манчестер Сити” футболчи учун курашда асосий даъвогар ҳисобланади. “Шаҳарликлар” бир неча кундан буён унинг вакиллари билан музокаралар олиб бормоқда ва Лондон клуби раҳбарияти бу жараёндан тўлиқ хабардор қилинган.
25 ёшли Энсо 2023-йилнинг қишида “Бенфика”дан “Челси”га ўтган эди. У шу кунгача барча турнирларда жами 166 та ўйинда майдонга тушиб, 30 та гол уришга муваффақ бўлган.
Аргентиналик яримҳимоячи лондонликлар билан биргаликда 2024/2025-йилги мавсумда Конференсиялар Лигасида ҳамда 2025-йилги Клублар ўртасидаги Жаҳон чемпионатида ғолиб чиққан. Футболчининг амалдаги шартномаси 2032-йилнинг ёзига қадар мўлжалланган бўлиб, Трансфермаркт портали унинг ҳозирги бозор қийматини 100 миллион еврога баҳоламоқда.