ЧатГПТ боласини ўлдиришни режалаштирган эркакни полицияга топширди
**ЧатГПТ ўғлини ўлдиришни режалаштирган шахсни ҳуқуқ-тартибот идораларига маълум қилди**
Бразилияда ўғлини ўлдиришни режалаштирган эркак ЧатГПТ билан ёзишмалари туфайли ҳибсга олинди. Сунъий интеллект ушбу шахснинг нияти ҳақида полицияга хабар берган. Бу ҳақда Билд нашри маълум қилди.
Хабарларга кўра, 36 ёшли фермер икки ойдан ортиқ вақт давомида сунъий интеллект билан мулоқотда бўлган. Суҳбатлар давомида у 8 ёшли ўғлини ва ўзини ўлдиришни режалаштирганини билдирган. Натижада, чатботнинг хавфсизлик тизими фаоллашиб, ушбу хавф ҳақида полицияга хабар берилган.
Хабарлар занжири халқаро миқёсда давом этган. Жумладан, эркакнинг ёзишмалари сунъий интеллект хавфсизлик тизимида хавотир уйғотган. ЧатГПТ оператори бўлган ОпенАИ бу ҳақда АҚШ Федерал қидирув бюросига (ФҚБ) огоҳлантирган. ФҚБ эса Бразилия ҳукумати билан боғланган.
Маълумот 16-июн куни Бразилия Адлия вазирлигининг технологик бўлинмаси — Сиберлабъга келиб тушган. Орадан уч кун ўтиб, полиция махсус операция ўтказиб, эркакни ҳибсга олган. Терговчиларнинг таъкидлашича, эркак ўз режасини 20-июн куни амалга оширишни кўзлаган. У бу санадан тўрт кун аввал қўлга олинган.
Полиция маълумотларига кўра, режалаштирилган қотилликнинг сабаби оддий бўлган. Яъни, эркак ўғлига алимент тўлашни истамаган ва у билан деярли мулоқот қилмаган. Эркакнинг хонадонини тинтув қилиш чоғида терговчилар номаълум модда солинган тўртта идиш ва арқон топган.
Эркак дастлаб ҳибсга олинган, бироқ 54 кунлик ҳибсдан сўнг, 13-август куни озодликка чиқарилган. Суд унинг озод қилинишига терговнинг ҳаддан ташқари чўзилиб кетганини сабаб қилиб кўрсатган. Энди эркак тўпиғига электрон браслет тақиб юриши шарт, шунингдек, унга ўғли ва унинг онасига яқинлашиш тақиқланган.
“Агар сунъий интеллект билан суҳбатлашиш ва сафсата сотиш жиноят бўлса, унда ҳамма қамалиши керак”, дея баёнот берди эркакнинг адвокати Педро Песси.
Аввалроқ ЧатГПТ ўтган ёзда янгиланганидан сўнг бутун дунё бўйлаб юзлаб фойдаланувчиларга биологик қурол ва заҳар яратиш, уларни қўллаш бўйича кўрсатмалар бериб келгани аниқланганди.